തിരുവനന്തപുരം: ഹര്‍ത്താല്‍ ദിനത്തില്‍ മുതിര്‍ന്ന കോണ്‍ഗ്രസ് നേതാവ് എ.കെ ആന്റണി പാര്‍ട്ടി പരിപാടിക്കെത്തിയത് ബൈക്കിനു പിറകിലിരുന്ന്. എന്നാല്‍ ഒദ്യോഗിക വസതിയായ കന്റോണ്‍മെന്റ് ഹൗസില്‍ നിന്ന് കാല്‍നടയായാണ് പ്രതിപക്ഷ നേതാവ് രമേശ് ചെന്നിത്തലന ഇതേ പരിപാടിക്കെത്തിയത്.
ഇന്ദിരാഭവനില്‍ സംഘടിപ്പിച്ച ദലിത് ഐക്യദാര്‍ഢ്യ കൂട്ടായ്മയുടെ സംസ്ഥാനതല ഉദ്ഘാടന പരിപാടിയില്‍ പങ്കെടുക്കാനാണ് ആന്റണി ബുള്ളറ്റിലെത്തിയതെന്നതാണ് കൗതുകം.
രാവിലെ വഴുതക്കാട്ടെ വസതിയില്‍ നിന്ന് ഇന്ദിരാഭവനിലെത്തിയ അദ്ദേഹം പരിപാടി കഴിഞ്ഞ് മടങ്ങിയതും ബൈക്കില്‍ തന്നെ. കന്റോണ്‍മെന്റ് ഹൗസില്‍ നിന്ന് ചെന്നിത്തലക്കൊപ്പം ഇന്ദിരാഭവനിലേക്കുള്ള രണ്ടു കി.മീ ദൂരം നടക്കാന്‍ കൊടിക്കുന്നില്‍ സുരേഷ് എം.പിയും എ.പി അനില്‍കുമാര്‍ എം.എല്‍.എയും കെ.പി.സി.സി ഭാരവാഹികളുമുണ്ടായിരുന്നു.
ദലിത് സംഘടനകളുടെ ഹര്‍ത്താലിനെ ഭരണസംവിധാനങ്ങള്‍ ഉപയോഗിച്ച് സര്‍ക്കാര്‍ അടിച്ചമര്‍ത്താന്‍ ശ്രമിക്കുകയാണെന്ന് നടത്തത്തിനിടയില്‍ ചെന്നിത്തല മാധ്യമങ്ങളോടു പറഞ്ഞു.