കോഴിക്കോട്: വസ്തുനികുതി പിരിവില്‍ 85.60 ശതമാനം പിരിച്ചെടുത്ത് ജില്ലയിലെ പഞ്ചായത്തുകള്‍ സംസ്ഥാനത്ത് ആറാം സ്ഥാനം നേടി. സംസ്ഥാന ശരാശരി 83.75 ശതമാനമാണ്. 2017-2018 വര്‍ഷം ജില്ലയില്‍ വസ്തുനികുതി ഇനത്തില്‍ പിരിച്ചെടുക്കേണ്ട 39.64സ കോടി രൂപയില്‍ 33.91 കോടി രൂപയാണ് പഞ്ചായത്തുകള്‍ പിരിച്ചെടുത്തത്. ജില്ലയിലെ 70 പഞ്ചായത്തുകളില്‍ 55 പഞ്ചായത്തുകള്‍ 100 ശതമാനം തുക പിരിച്ചെടുത്തു.
100 ശതമാനം തുക പിരിച്ചെടുത്ത പഞ്ചായത്തുകളുടെ എണ്ണത്തില്‍ ജില്ല രണ്ടാം സ്ഥാനത്താണ്. ചരിത്രത്തിലാദ്യമായാണ് ജില്ല നികുതി പിരിവില്‍ നേട്ടം കൈവരിക്കുന്നത്. പഞ്ചായത്ത് ജീവനക്കാരുടേയും ഭരണസമിതി അംഗങ്ങളുടേയും പെര്‍ഫോമന്‍സ് ഓഡിറ്റ് വിഭാഗത്തിന്റെ മുഴുസമയ മേല്‍നോട്ടത്തിന്റെയും വകുപ്പിന്റെയും പിന്തുണയോടെയാണ് ചരിത്രനേട്ടം കൈവരിച്ചത്.
അവധി ദിവസങ്ങളില്‍ പോലും തുറന്നുപ്രവര്‍ത്തിച്ചാണ് പഞ്ചായത്തുകള്‍ നികുതിപിരിവ് നടത്തിയിരുന്നത്. കുടിശ്ശിക തുക 30നകം പിരിച്ചെടുക്കുന്നതിന് പഞ്ചായത്തുകള്‍ തയാറെടുത്ത് കഴിഞ്ഞു. ഇതുമായി ബന്ധപ്പെട്ട കാര്യങ്ങള്‍ ചര്‍ച്ച ചെയ്യുന്നതിന് പഞ്ചായത്ത് ഉദ്യോഗസ്ഥരുടെ അടിയന്തരയോഗം 17ന് പഞ്ചായത്ത് ഡെപ്യൂട്ടി ഡയറക്ടര്‍ ചേംബറില്‍ ചേരും.