ഇരിങ്ങാലക്കുട: താലൂക്കാശുപത്രിയിലെ മോര്‍ച്ചറി ദുരവസ്ഥയെ കുറിച്ചുള്ള വാര്‍ത്തയുമായി ബന്ധപ്പെട്ടു ഇന്നലെ താലൂക്കാശുപത്രി സൂപ്രണ്ടിനെ യുവമോര്‍ച്ച പ്രവര്‍ത്തകര്‍ ഉപരോധിച്ചു.
മുദ്രാവാക്യം വിളികളുമായി പ്രതിഷേധം തുടര്‍ന്ന പ്രവര്‍ത്തകര്‍ പിന്നീടു അടിയന്തിരമായി മോര്‍ച്ചറി നവീകരണം നടത്തുമെന്ന സുപ്രണ്ടിന്റെ ഉറപ്പിനേ തുടര്‍ന്നാണു പിരിഞ്ഞു പോയത്.
താലൂക്കാശുപത്രിയിലെ മോര്‍ച്ചറിയില്‍ സൂക്ഷിക്കുന്ന മൃതദേഹങ്ങള്‍ എലി കടിക്കുന്നതായും ഉറുമ്പരിക്കുന്നതായും പരാതിയുടെ അടിസ്ഥാനത്തില്‍ മാധ്യമങ്ങള്‍ വിഷയം വാര്‍ത്തയാക്കിയിരുന്നു.
പോസ്റ്റ്‌മോര്‍ട്ടം നടത്തുന്നതിനു മെഡിക്കല്‍ കോളജിലേക്കു കൊണ്ടുപോകാന്‍ എത്തുമ്പോള്‍ കാണുന്നതു ഉറുമ്പുകള്‍ പൊതിഞ്ഞ നിലയിലുള്ള മൃതദേഹങ്ങളാണെന്നും ചിലപ്പോള്‍ എലി കടിച്ചതായും കാണാറുള്ളതായി പൊലിസാണു കഴിഞ്ഞ താലൂക്ക് വികസന സമിതി യോഗത്തില്‍ പരാതി ഉന്നയിച്ചത്.
പാറയില്‍ ഉണ്ണികൃഷ്ണ്‍, ബിജു വര്‍ഗീസ്, അഖിലേഷ് വിശ്വനാഥന്‍, കെ.പി മിഥുന്‍, അജീഷ്, ശ്യാംജി, പവീഷ് കിഴുത്താണി, ലാല്‍കൃഷ്ണ, ജിനു, സിന്റോ ഉപരോധ സമരത്തിനു നേതൃത്വം നല്‍കി.