കൊല്ലം: ഇരവിപുരം സ്ഥാനാര്‍ഥി നിര്‍ണയത്തിന് ശേഷം സംഘര്‍ഷം രൂക്ഷമായതിന് പിന്നാലെ ഇന്നലെ ആര്‍.എസ്.പി യോഗത്തിലും സംഘര്‍ഷം.  സംസ്ഥാന ആക്ടിങ് സെക്രട്ടറി പങ്കെടുത്ത ആര്‍.എസ്.പി ഇരവിപുരം മണ്ഡലം കമ്മിറ്റി യോഗത്തിലാണ് സംഘര്‍ഷാവസ്ഥയുണ്ടായത്. 

യോഗത്തില്‍ മണ്ഡലം സെക്രട്ടറി നൗഷാദ് പങ്കെടുക്കാനെത്തിയതാണ് പ്രശ്‌നത്തിന് കാരണമായത്. പ്രേമചന്ദ്രന്റെ അനുകൂലികള്‍ നൗഷാദിനെ തടയുകയും ബിജു ലക്ഷ്മികാന്തന്‍ നൗഷാദ് ഒപ്പിടുന്നത് തടയുകയും ചെയ്തു.

പാര്‍ട്ടിയില്‍ നിന്ന് രാജി വെച്ചെന്ന് പരസ്യ പ്രസ്താവന നടത്തുകയും സംസ്ഥാന നേതാക്കളെ അധിക്ഷേപിക്കുകയും ചെയ്ത നൗഷാദിനെ പാര്‍ട്ടിയില്‍ നിന്ന് പുറത്താക്കണമെന്നാണ് ഇവര്‍ ആവശ്യപ്പെടുന്നത്.  എന്നാല്‍ താന്‍ രാജിക്കത്ത് ഇതുവരെയും ആര്‍ക്കും കൊടുത്തിട്ടില്ലെന്നും തനിയ്ക്ക് പറയാനുള്ളത് പറഞ്ഞിട്ടേ രാജിക്കത്ത് കൊടുക്കൂ എന്നും നൗഷാദ് നിലപാടെടുത്തു. 

ALSO READ: 'അച്ഛനെ വരെ ആക്ഷേപിച്ചു';പാര്‍ട്ടി മെമ്പര്‍ഷിപ്പ് പുതുക്കാന്‍ തയ്യാറാകാതെ ജി സുധാകരന്‍, രൂക്ഷ വിമര്‍ശനവുമായി കുറിപ്പ്

ഇരവിപുരത്ത് തന്റെ പേര് നേരത്തെ ഉയര്‍ന്നതിനു ശേഷം വെട്ടിയത് എന്തിനാണെന്ന് വ്യക്തമാക്കണമെന്ന് ആവശ്യപ്പെട്ട് നൗഷാദ് യോഗത്തില്‍ തന്നെ ഇരുന്നു. യോഗത്തില്‍ ഇരു ഗ്രൂപ്പുകളും കൈയ്യാങ്കളിയുടെ വക്കത്ത് എത്തിയെങ്കിലും മുതിര്‍ന്ന നേതാക്കള്‍ ഇടപെട്ട് ശാന്തമാക്കി. 

ഷിബു ബേബി ജോണിന്റെ സമ്മര്‍ദത്തിന് വഴങ്ങി ഇരവിപുരത്ത് ആര്‍.എസ്.പി സ്ഥാനാര്‍ഥിയായി വിഷ്ണു മോഹനെ തീരുമാനിച്ചത് മുതല്‍ ആര്‍.എസ്.പിയില്‍ പൊട്ടിത്തെറിയുണ്ടായിരുന്നു. പാര്‍ട്ടി വിടുമെന്ന ഷിബു ബേബി ജോണിന്റെ ഭീഷണിക്ക് വഴങ്ങിയായിരുന്നു ഇരവിപുരത്ത് വിഷ്ണു മോഹനെ സ്ഥാനാര്‍ഥിയായി തീരുമാനിച്ചത്. 

പിന്നാലെ, ഇരവിപുരം മണ്ഡലം സെക്രട്ടറി എന്‍. നൗഷാദ് രാജിവയ്ക്കുകയും സംസ്ഥാന കമ്മിറ്റി അംഗം സജി ഡി. ആനന്ദ് പാര്‍ട്ടി വിടുകയും ചെയ്തിരുന്നു.

Internal tensions have intensified within the Revolutionary Socialist Party (RSP) following the recent candidate selection decision. A constituency secretary has reportedly announced his resignation during a party meeting, expressing strong dissatisfaction over the leadership’s choice of candidate.