കോവളം: ടൂറിസം വകുപ്പിന്റെ കടുത്ത അവഗണന നേരിടുന്ന കോവളം തീരത്ത് പാര്‍ക്ക് ചെയ്തിരുന്ന കാറുകള്‍ കുത്തിതുറന്ന് ലാപ്‌ടോപ്പും പണവും മൊബൈല്‍ഫോണുകളും മോഷ്ടിച്ചത് സഞ്ചാരികളെയും ടൂറിസം മേഖലയില്‍ പ്രവര്‍ത്തിക്കുന്നവരെയും ആശങ്കയിലാക്കുന്നു.
സ്വകാര്യ ഹോട്ടലുകാരുടെ സെക്യൂരിറ്റിയുടെയും പൊലിസിന്റെയും കാവലിലെന്ന് പറയുന്ന ബീച്ചിലെ സ്വകാര്യ പാര്‍ക്കിങ് ഏര്യയില്‍ നിര്‍ത്തിയിരുന്ന സഞ്ചാരികളുടെ മുന്ന് കാറുകള്‍ കുത്തിത്തുറന്നാണ് വിലപിടിപ്പുള്ളതെല്ലാം കവര്‍ച്ച ചെയ്യപ്പെട്ടത്.
ലാപ് ടോപ്പുക്കളും മൊബൈല്‍ ഫോണുകളും പണവും മറ്റ് രേഖകളുമടങ്ങിയപേഴ്‌സും ഐപാടും കവര്‍ന്ന മോഷ്ടാക്കള്‍ കവര്‍ന്നെടുത്ത എ.ടി.എം കാര്‍ഡ് കൊണ്ട് പണം പിന്‍വലിക്കാനുള്ള ശ്രമവും നടത്തി.
കഴിഞ്ഞ ദിവസം വൈകുന്നേരം കോവളം ഹൗവാ ബീച്ചിലെ പാര്‍ക്കിങ് ഏര്യയില്‍ നിന്നാണ് മണിക്കൂറുകള്‍ക്കുള്ളില്‍ മൂന്ന് കാറുകളില്‍ മോഷണം നടന്നത്.
ഗുരുവായൂര്‍ സ്വദേശി നിമ്മിയുടെ കാറില്‍ നിന്ന് ലാപ്‌ടോപ്പും എ.ടിഎം കാര്‍ഡും പണവുമടങ്ങിയ പഴ്‌സും, കുളച്ചല്‍ സ്വദേശി മുഹമ്മദ് റഫീക്കിന്റെ കാറില്‍ നിന്ന് മൊബൈല്‍ ഫോണും ഐപാഡും, കരകുളം സ്വദേശി വൈഷ്ണവിന്റെ ഫോണും എ.ടിഎം കാര്‍ഡുമാണ് കള്ളന്‍മാര്‍കടത്തിക്കൊണ്ടുപോയത്.
വൈകുന്നേരത്തോടെ ബീച്ചിലെത്തി വാഹനം പാര്‍ക്ക് ചെയ്ത ശേഷം ബീച്ച് കാണാനിറങ്ങി ഏഴരമണിയോടെ തിരിച്ചെത്തിയപ്പോഴാണ് മോഷണം
നടന്ന കാര്യമറിയുന്നത്. രാത്രി തന്നെ വൈഷ്ണവിന്റെ എ.ടിഎം കാര്‍ഡുപയോഗിച്ച് പണം തട്ടാന്‍ ശ്രമിച്ചതായ സന്ദേശവും കിട്ടി. എച്ച്.ഡി.എഫ് സി.ബാങ്കിന്റെ കാര്‍ഡായതിനാല്‍ അന്വേഷണത്തിന് ബാങ്കിന്റെ സഹായം തേടാന്‍ കോവളം പൊലിസ് ശ്രമം തുടങ്ങി. പാര്‍ക്കിങ് ഏര്യയില്‍ സ്വകാര്യ സെ+++ക്യൂരിറ്റിക്കാരും, ടൂറിസം പൊലിസും ഉണ്ടായിരുന്നതായി സഞ്ചാരികള്‍ പറയുന്നു.