മുക്കം: മുക്കം പി.സി. ജങ്ഷനിലെ സീബ്ര ലൈനിലൂടെ പൊതു ജനങ്ങള്‍ക്ക് ഭീതിയില്ലാതെ റോഡ് മുറിച്ച് കടക്കാന്‍ സൗകര്യമാക്കണമെന്നാവശ്യപ്പെട്ട് ടീന്‍ ഇന്ത്യ ഹൈസ്‌കൂള്‍ വിദ്യാര്‍ഥികളുടെ കൂട്ടായ്മ മുക്കം എസ്.ഐ. കെ.പി അഭിലാഷിന് നിവേദനം നല്‍കി.
മുക്കം നഗരത്തിലെ ട്രാഫിക് പരിഷ്‌ക്കരണത്തില്‍ നല്ല മതിപ്പാണ് ഞങ്ങള്‍ക്കുള്ളത്. പക്ഷെ പി.സി ജങ്ഷനിലെ സീബ്രാലൈനിലൂടെ കടന്ന് പോകണമെങ്കില്‍ വാഹനങ്ങളുടെ കുതിപ്പ് കാരണം ജീവന്‍ പണയം വച്ച് നടക്കണം. മതിയായ പൊലിസ് സംവിധാനത്തിന്റെ അഭാവവും, വാഹനങ്ങളിലെ ഡ്രൈവര്‍മാര്‍ക്ക് അവബോധമില്ലാത്തതുമാണ് പ്രശ്‌നത്തിനുള്ള കാരണം. ഈ പ്രശ്‌നം ഗൗരവമായി പരിഗണിച്ച് സത്വര നടപടികള്‍ സ്വീകരിക്കണമെന്നും വിദ്യാര്‍ഥികള്‍ നിവേദനത്തിലൂടെ പൊലിസിനോട് ആവശ്യപ്പെട്ടു.
ടീന്‍ ഇന്ത്യ ജില്ലാ വൈസ് കാപ്റ്റന്‍ ശാദ് മുഹമ്മദ്, ഏരിയാ കമ്മിറ്റിയംഗം അമല്‍ ഹുസൈന്‍, മുക്കം യൂനിറ്റ് ക്യാപ്റ്റന്‍ എസ്. സിദാന്‍, സെക്രട്ടറി മുഹമ്മദ് ഇഹ്‌സാന്‍, ഷാഹിദ്, ഷാനില്‍ എന്നിവരടങ്ങുന്ന സംഘമാണ് നിവേദനം നല്‍കിയത്.