ജയ്പൂര്‍: രാജസ്ഥാനില്‍ റാലി സംഘടിപ്പിക്കാനെത്തിയ ഗുജറാത്ത് എം.എല്‍എയും ദലിത് നേതാവുമായ ജിഗ്നേഷ് മേവാനിയെ ജയ്പൂര്‍ വിമാനത്താവളത്തില്‍ പൊലിസ് തടഞ്ഞു. ജില്ലാ ഭരണകൂടം റാലിക്കു നിശ്ചയിച്ചിരുന്ന നാഗോറിലേക്കുള്ള പ്രവേശനം നിഷേധിച്ചതിനെ തുടര്‍ന്നാണ് നടപടിയെന്ന് പൊലിസ് പറഞ്ഞു. വിമാനത്താവളത്തില്‍ തന്ന തടഞ്ഞതായി മേവാനി ട്വീറ്റ് ചെയ്തു. നാഗോര്‍ ജില്ലയിലേക്കുള്ള പ്രവേശനം തടഞ്ഞിരിക്കുകയാണെന്നുള്ള ഉത്തരവില്‍ പൊലിസ് ഒപ്പുവെപ്പിച്ചതായും മേവാനി ട്വീറ്റ് ചെയ്തു. എന്നാല്‍ നിരോധനാജ്ഞക്കുശേഷം മേവാനിക്ക് അവിടെ സ്വതന്ത്രമായി സഞ്ചരിക്കാമെന്നും അദ്ദേഹത്തെ തടഞ്ഞുവെക്കുകയോ അറസ്റ്റുചെയ്യുകയോ ചെയ്തിട്ടില്ലെന്നും പൊലിസ് വ്യക്തമാക്കി.