കോഴിക്കോട്‌ : കളിയും വരയുമായി അവധിക്കാലം ആഘോഷമാക്കുകയാണ് 'നാട്ടുവെളിച്ചം' ക്യാംപുകളിലെ കുട്ടികള്‍. ജില്ലയിലെ 83 പ്രതിഭാ കേന്ദ്രങ്ങളിലായി നടക്കുന്ന ക്യാംപുകളില്‍ രണ്ടായിരത്തോളം കുട്ടികളാണ് വ്യത്യസ്ത രീതിയില്‍ അവധിക്കാലം ആഘോഷിക്കുന്നത്. മലയോര, തീരദേശ മേഖലകള്‍ക്ക് പ്രാധാന്യം നല്‍കി സര്‍വ്വശിക്ഷാ അഭിയാന്‍ നടത്തിവരുന്ന പ്രതിഭാ കേന്ദ്രങ്ങളിലാണ് മൂന്നുദിവസത്തെ നാട്ടുവെളിച്ചം ക്യാപുകള്‍.
സാമൂഹ്യ പിന്നാക്കാവസ്ഥ അനുഭവിക്കുന്ന കുട്ടികളുടെ പഠനമുന്നേറ്റവും സര്‍ഗശേഷികളുടെ പരിപോഷണവും ലക്ഷ്യമാക്കിയാണ് എസ്.എസ്.എ പ്രതിഭാ കേന്ദ്രങ്ങള്‍ ആരംഭിച്ചത്. ശുചിത്വം, ആരോഗ്യം, തൊഴില്‍ശേഷി എന്നിവ വര്‍ധിപ്പിക്കുക, സ്‌കൂളിലെ കൊഴിഞ്ഞുപോക്ക് തടയുക എന്നിവയും ലക്ഷ്യങ്ങളാണ്. പഞ്ചായത്തില്‍ ഒരു കേന്ദ്രമെങ്കിലും നിര്‍ബന്ധമായും ഉണ്ടാകുന്ന രീതിയിലാണ് ജില്ലയില്‍ പദ്ധതി ആവിഷ്‌കരിച്ചിരിക്കുന്നതെന്നും ഇതിനായി നടപ്പുവര്‍ഷം 25 ലക്ഷം രൂപ മാറ്റിവച്ചതായും ജില്ലാ പ്രോഗ്രാം ഓഫിസര്‍ വി. വസീഫ് പറഞ്ഞു.