ആലുവ: വരാപ്പുഴ കസ്റ്റഡി മരണക്കേസില്‍ റൂറല്‍ ജില്ലാ പൊലിസ് മേധാവിയെ ഒന്നാം പ്രതിയാക്കി കേസെടുക്കണമെന്നും അന്വേഷണം സി.ബി.ഐക്ക് വിടണമെന്നും കെ.പി.സി.സി പ്രസിഡന്റ് എം.എം ഹസന്‍ ആവശ്യപ്പെട്ടു. വര്‍ഗീയ ഫാസിസത്തിനും അക്രമത്തിനുമെതിരേ കെ.പി.സി.സി സംഘടിപ്പിച്ച ജനമോചനയാത്രയുടെ ജില്ലയിലെ ആദ്യ സ്വീകരണ യോഗത്തില്‍ സംസാരിക്കുകയായിരുന്നു അദ്ദേഹം. ശ്രീജിത്തിനെ പിടികൂടിയത് റൂറല്‍ എസ്.പി നേരിട്ട് നിയന്ത്രിക്കുന്ന റൂറല്‍ ടൈഗര്‍ ഫോഴ്‌സാണ്. ഈ സാഹചര്യത്തില്‍ എസ്.പിയാണ് കേസിലെ ഒന്നാം പ്രതി. മാര്‍ക്‌സിസ്റ്റ് പാര്‍ട്ടിക്ക് വേണ്ടി വിടുപണി ചെയ്യുന്ന നയമാണ് ഇപ്പോള്‍ പൊലിസിന്റേത്. രാജ്യത്ത് മതേതരത്വത്തിന് മരണമണി മുഴങ്ങുകയാണ്. വര്‍ഗീയതയും ഫാസിസവും ഏത് നിമിഷവും നമ്മളെ വിഴുങ്ങുകയാണെന്നും അദ്ദേഹം പറഞ്ഞു.
പ്രിയദര്‍ശിനി ടൗണ്‍ ഹാളില്‍ നടന്ന സ്വീകരണ യോഗം യു.ഡി.എഫ് കണ്‍വീനര്‍ പി.പി തങ്കച്ചന്‍ ഉദ്ഘാടനം ചെയ്തു. ഡി.സി.സി പ്രസിഡന്റ് ടി.ജെ വിനോദ് അദ്ധ്യക്ഷത വഹിച്ചു. എം.എല്‍.എമാരായ വി.ഡി. സതീശന്‍, അന്‍വര്‍ സാദത്ത്, പി.ടി. തോമസ്, റോജി ജോണ്‍, എല്‍ദോസ് കുന്നപ്പിള്ളി, വി.പി. സജീന്ദ്രന്‍, കെ.പി.സി.സി ഭാരവാഹികള്‍ തമ്പാന്നൂര്‍ രവി, ശൂരനാട് രാജശേഖരന്‍, രാജ് മോഹന്‍ ഉണ്ണിത്താന്‍, സുരേഷ് ബാബു, ജോസഫ് വാഴയ്ക്കന്‍, യു.ഡി.എഫ് ജില്ലാ ചെയര്‍മാന്‍ എം.ഒ. ജോണ്‍, തോപ്പില്‍ അബു, ദിലീപ് കപ്രശേരി, ലത്തഫ് പൂഴിത്തറ എന്നിവര്‍ സംസാരിച്ചു. ചടങ്ങില്‍ രാഷ്ട്രീയ വൈരത്താല്‍ കൊലചെയ്യപ്പെട്ടവരുടെ അമ്മമാരോട് ഐക്യദാര്‍ഢ്യം പ്രഖ്യാപിച്ച് 'അമ്മ മനസ്സ്' എന്ന പേരില്‍ മൊബൈല്‍ ആപ്പ് പുറത്തിറക്കി. ജനമോചനയാത്രയ്ക്ക് പറവൂരിലും എറണാകുളത്തും മൂവാറ്റുപുഴയിലും ഗംഭീര വരവേല്‍പ്പ് നല്‍കി.