പൂച്ചാക്കല്‍: ജില്ലാ സാക്ഷരതാ മിഷന്റെ നവചേതന പദ്ധതിക്ക് പാണാവള്ളി ഗ്രാമപഞ്ചായത്തില്‍ തുടക്കമായി. പട്ടികജാതി കോളനി നിവാസികള്‍ക്ക് പഠിപ്പും - അറിവും നല്‍കുകയെന്ന ലക്ഷ്യത്തോടെ സംസ്ഥാന സാക്ഷരതാ മിഷന്‍ നടത്തിവരുന്ന സാക്ഷരത പ്രവര്‍ത്തനമാണ് പാണാവള്ളി പഞ്ചായത്തിലെ പതിനാറാം വാര്‍ഡില്‍ കരാളപ്പതി കോളനിയില്‍ തുടങ്ങിയത്.
ജില്ലാ പഞ്ചായത്ത് വൈസ് പ്രസിഡന്റ് ദലീമ ജോജോ ഉദ്ഘാടനം ചെയ്തു. പഞ്ചായത്ത് പ്രസിഡന്റ രാജേഷ് വിവേകാനന്ദ അദ്ധ്യക്ഷത വഹിച്ചു. പഠിതാക്കളായ മുതിര്‍ന്ന പൗരന്മാരെ ബ്ലോക്ക് പഞ്ചായത്ത് പ്രസിഡന്റ് നിര്‍മ്മലാ ശെല്‍വരാജ് ആദരിച്ചു. സാക്ഷരതാ സന്ദേശം ഗ്രാമപഞ്ചായത്ത് വികസന സ്റ്റാന്റിംങ്ങ് കമ്മറ്റി ചെയര്‍മാന്‍ പ്രേംലാല്‍ നിര്‍വഹിച്ചു.
പാഠപുസ്തക വിതരണം വാര്‍ഡ് മെമ്പര്‍ സുനിത കൃഷ്ണകുമാര്‍ വിതരണം ചെയ്തു. ജില്ലാ കോഡിനേറ്റര്‍ കെ.വി രതീഷ് പദ്ധതി വിശദീകരണവും ജില്ലാ പഞ്ചായത്ത് മെമ്പര്‍ പി.എം പ്രമോദ് സ്വാഗതവും പറഞ്ഞു.
ചടങ്ങില്‍ ആര്‍ സിംല, പി കെ ജോസഫ്, ഷീലാ കാര്‍ത്തികേയന്‍, ചന്ദ്രിക രമേശന്‍, കെ കെ രമണി, എന്‍ റ്റി ഭാസ്‌കരന്‍, ജയദേവന്‍കൂടയ്ക്കല്‍, ജയറാം നായിക്ക്, സണ്ണി ജോണ്‍, എസ് ജലജ എന്നിവര്‍ സംസാരിച്ചു. ജില്ലയില്‍ പാണാവള്ളി കൂടാതെ അരുര്‍, നീലംപേരൂര്‍, പത്തിയൂര്‍, മുളക്കുഴ, ഭരണിക്കാവ്, നെടുമുടി, പാലമേല്‍ തുടങ്ങിയ പഞ്ചായത്തുകളിലെ പട്ടികജാതി കോളനികളിലും നവചേതന പദ്ധതി ആരംഭിക്കും.