കൊച്ചി:  മിഷേല്‍ ഷാജിയുടെ മരണത്തില്‍ സി.ബി.ഐ അന്വേഷണം വേണം എന്ന ആവശ്യം ഹൈക്കോടതി തള്ളി. മിഷേല്‍ ഷാജിയുടെ ദുരൂഹ മരണത്തില്‍ സി.ബി.ഐ അന്വേഷണം വേണമെന്ന് ആവശ്യപ്പെട്ട് പിതാവാണ് ഹൈക്കോടതിയെ സമീപിച്ചത്. അന്വേഷണം എത്രയും വേഗം പൂര്‍ത്തിയാക്കി അന്തിമ റിപ്പോര്‍ട്ട് സമര്‍പ്പിക്കാന്‍ ജസ്റ്റിസ് സി.എസ്.സുധ ക്രൈംബ്രാഞ്ചിന് നിര്‍ദ്ദേശം നല്‍കി.

സി.ബി.ഐ അന്വേഷണം വേണമെന്ന ആവശ്യം ഏഴു വര്‍ഷമായി ഹൈക്കോടതിക്ക് മുന്നിലുണ്ട്. കഴിഞ്ഞവര്‍ഷം കേസില്‍ ഹൈക്കോടതി അമിക്കസ് ക്യൂറിയെയും നിയമിച്ചിരുന്നു. 

2017 മാര്‍ച്ച് 5നാണ് കൊച്ചിയില്‍ നിന്നും മിഷേല്‍ ഷാജിയെ കാണാതായത്. എറണാകുളം കച്ചേരിപ്പടിയിലെ സെന്റ് തെരേസാസ് ഹോസ്റ്റലില്‍ താമസിച്ച് സ്വകാര്യ കോളേജില്‍ സി.എ പഠിക്കുകയായിരുന്നു മിഷേല്‍. പിറ്റേന്ന് വൈകീട്ട് ആറുമണിയോടെ കൊച്ചി കായലില്‍, ഐലന്‍ഡ് വാര്‍ഫില്‍ നിന്ന് മിഷേലിന്റെ മൃതദേഹം കണ്ടു കിട്ടി

കാണാതായ ദിവസം വൈകുന്നേരം മിഷേല്‍ കലൂരിലെ പള്ളിയിലെത്തി മടങ്ങുന്ന ദൃശ്യങ്ങള്‍ പൊലിസിന് ലഭിച്ചിരുന്നു. ലോക്കല്‍ പൊലിസിന്റെയും ക്രൈംബ്രാഞ്ചിന്റെയും അന്വേഷണത്തില്‍ മിഷേലിന്റെ മരണം ആത്മഹത്യയാണെന്നാണ് കണ്ടെത്തിയത്.