കൊച്ചി: കായല്‍ സമ്മേളന സ്വാഗത സംഘം ഏര്‍പ്പെടുത്തിയ പ്രഥമ മഹാത്മാ അയ്യങ്കാളി പുരസ്‌കാരം സി.ഡി സജിത്കുമാറിന്. പാലക്കാട് ജില്ലയിലെ കൊങ്ങപ്പാടം എന്ന പിന്നാക്ക ഗ്രാമത്തില്‍ നടത്തിയ വിദ്യാഭ്യാസ, സാമൂഹിക പരിവര്‍ത്തനങ്ങള്‍ കണക്കിലെടുത്താണ് പുരസ്‌കാരം നല്‍കുന്നതെന്ന് സംഘാടകര്‍ വാര്‍ത്താസമ്മേളനത്തില്‍ പറഞ്ഞു. സജിത്കുമാറിന്റെ പ്രവര്‍ത്തനങ്ങളുടെ ഫലമായി ഗ്രാമത്തിലെ നിരവധി വിദ്യാര്‍ഥികളാണ് ഉന്നത വിദ്യാഭ്യാസത്തിന്റെ പടവുകള്‍ കയറിയത്. ദോഹയില്‍ എന്‍ജിനീയറാണ് സജിത് കുമാര്‍.
25,000 രൂപയും പ്രശസ്തിപത്രവും അടങ്ങുന്നതാണ് പുരസ്‌കാരം. 20,21 തിയതികളിലായി കൊച്ചി മറൈന്‍ ഡ്രൈവില്‍ നടക്കുന്ന കായല്‍ സമ്മേളനത്തിന്റെ 105-ാം വാര്‍ഷികാഘോഷങ്ങളുടെ സമാപന ചടങ്ങില്‍ അയ്യങ്കാളിയുടെ ചെറുമകന്‍ എസ്. ഗിരിജാത്മജന്‍ പുരസ്‌കാരം സമര്‍പ്പിക്കും. പി.വി കൃഷ്ണന്‍കുട്ടി, എ.ശശിധരന്‍, വി.പി അയ്യപ്പന്‍ എന്നിവര്‍ വാര്‍ത്താ സമ്മേളനത്തില്‍ പങ്കെടുത്തു.