അമ്പലപ്പുഴ: നിയന്ത്രണം വിട്ട മാരുതി കാര്‍ ടെമ്പൊ ട്രാവലറില്‍ ഇടിച്ച് കാര്‍ യാത്രക്കാരായ ഒരു കുടുബത്തിലെ മൂന്ന് പേര്‍ക്കും ട്രാവലര്‍ ഡ്രൈവര്‍ക്കും പരിക്ക് .ഇവരെ ആശുപത്രിയില്‍ പ്രവേശിപ്പിച്ചു. ആലപ്പുഴ ഇന്ദിരാ ജങ്ഷനില്‍ കാട്ടുങ്കല്‍ കമ്പിക്കകം വീട്ടില്‍ രമേഷ് (46) ഇദ്ദേഹത്തിന്റെ ഭാര്യ സന്ധ്യ (42) മകള്‍ സ്‌നേഹ (12) എന്നിവരെ വണ്ടാനം മെഡിക്കല്‍ കോളജ് ആശുപത്രിയിലും ഗുരുതരാവസ്ഥയെ തുടര്‍ന്ന് എറണാകുളത്തെ സ്വകാര്യ ആശുപത്രിയിലും പ്രവേശിപ്പിച്ചു. നിസാരമായി പരുക്കേറ്റ ടെമ്പോ ട്രാവലര്‍ ഡ്രൈവര്‍ നജീബ് (46) വണ്ടാനം മെഡിക്കല്‍ ആശുപത്രിയില്‍ ചികിത്സയിലാണ്.
വ്യാഴാഴ്ച അര്‍ധരാത്രിയോടെ ദേശീയ പാതയില്‍ തൂക്കുകുളം ഭാഗത്ത് വെച്ചായിരുന്നു അപകടം. അമ്പലപ്പുഴ ഭാഗത്ത് നിന്നും ആലപ്പുഴക്ക് പോകുകയായിരുന്ന മാരുതി സുസുക്കി കാര്‍ എതിര്‍ദിശയിലൂടെ സഞ്ചരിച്ചിരുന്ന ടെമ്പൊ ട്രാവലറില്‍ ഇടിക്കുകയായിരുന്നു.ഇടിയുടെ ആഘാതത്തില്‍ ഇരു വാഹനങ്ങളുടെയും മുന്‍ ഭാഗം ഭാഗികമായി തകരുകയും പരിക്കേറ്റ മൂന്ന് പേരും കാറിനുള്ളില്‍ കുടുങ്ങുകയുമായിരുന്നു. പിന്നീട് വിവരമറിഞ്ഞെത്തിയ പുന്നപ്ര പൊലിസും നാട്ടുകാരും ചേര്‍ന്ന് രക്ഷാപ്രവര്‍ത്തനത്തിലൂടെ പരിക്കേറ്റവരെ കാറില്‍ നിന്ന് പുറത്തെടുത്ത് ആശുപത്രിയില്‍ എത്തിച്ചു.