പനമരം: മുസ്‌ലിം സമൂഹത്തിന് നവോത്ഥാനം നേടിക്കൊടുത്തവരെന്ന് വ്യാജ അവകാശവാദവുമായി രംഗത്തു വന്നവര്‍ മുച്ചൂടും ഭിന്നിപ്പും അനൈക്യവും സൃഷ്ടിക്കുകയല്ലാതെ എന്തു നവോത്ഥാനമാണ് കേരളത്തില്‍ ഉണ്ടാക്കിയതെന്ന് വ്യക്തമാക്കണമെന്നും നാസര്‍ ഫൈസി കൂടത്തായ് പറഞ്ഞു. സമസ്ത ജില്ലാ സമ്മേളനത്തില്‍ പൈതൃകം എന്ന വിഷയത്തില്‍ സംസാരിക്കുകയായിരുന്നു അദ്ദേഹം.
മത വിദ്യാഭ്യാസ രംഗത്തുള്‍പ്പെടെ സമൂഹത്തിന് പുതുജീവന്‍ നല്‍കി നവോത്ഥാനം സൃഷ്ടിച്ചത് സമസ്തയാണ്.
സമസ്ത ഐക്യത്തിന് സജ്ജമാണ്. എന്നാല്‍ ഐക്യചര്‍ച്ച പുരോഗമിക്കുന്നുവെന്ന വ്യാജ പ്രചരണങ്ങള്‍ നടത്തി പൊതുധാരയില്‍ കടന്നുവരാന്‍ ശ്രമിക്കുന്നവരെയും ചര്‍ച്ചകള്‍ക്ക് നേതൃത്വം നല്‍കാന്‍ അവരോധിക്കപ്പെട്ടുന്നു എന്ന രീതിയില്‍ സ്വയം ഏറ്റെടുത്ത് ആളാവാന്‍ ശ്രമിക്കുന്നവരെയും കരുതിയിരിക്കണമെന്നും അദ്ദേഹം കൂട്ടിച്ചേര്‍ത്തു.