ചാത്തന്നൂര്‍: നിര്‍ധനയുവതികളെ വിദേശത്ത് കടത്തി പെണ്‍വാണിഭ സംഘത്തിന് കൈമാറുന്ന സംഘത്തിലെ പ്രമുഖനെ പാരിപ്പള്ളി പൊലിസ് പിടികൂടി. തിരുവനന്തപുരം മണക്കാട് ഉഷാഭവനില്‍ സുധര്‍മനാ(57)ണ് പിടിയിലായത്. ദുബായിലെ പെണ്‍വാണിഭ സംഘത്തിന്റെ പിടിയില്‍ നിന്ന് രക്ഷപ്പെട്ട് നാട്ടിലെത്തിയ വട്ടക്കുഴിക്കല്‍ സ്വദേശിയായ യുവതിയുടെ പരാതി പ്രകാരം പൊലിസ് നടത്തിയ അന്വേഷണത്തിലാണ് പ്രതി കുടുങ്ങിയത്.
കഴിഞ്ഞ 20 വര്‍ഷമായി ദുബായില്‍ ജോലിനോക്കുന്ന പ്രതി നിരവധി പെണ്‍കുട്ടികളെ ജോലി വാഗ്ദാനം ചെയ്ത് വിസിറ്റിങ് വിസയില്‍ വിദേശത്ത് എത്തിച്ചതായി പൊലിസ് പറഞ്ഞു. അവിടെ നിന്ന് ഏജന്റുമാര്‍ യുവതികളെ കൂട്ടികൊണ്ടുപോയി ആവശ്യക്കാര്‍ക്ക് കൈമാറുകയാണ് പതിവ്.പാരിപ്പള്ളിയില്‍ നിന്ന് ഇതിനോടകം അഞ്ച് പേരെ കടത്തിയതായും വിദേശത്തുള്ള കൂട്ടുപ്രതികളെ നാട്ടിലെത്തിക്കാന്‍ ശ്രമം തുടങ്ങിയതായും പൊലിസ് അറിയിച്ചു. എസ്.ഐ ഗിരീശന്‍,അഡി. എസ്.ഐ വാമദേവന്‍, എ.എസ.്‌ഐ അനില്‍, വനിതാ സി.പി.ഒ സുധ എന്നിവരാണ് പ്രതിയെ പിടികൂടിയത്. ഇയാളെ പരവൂര്‍ കോടതിയില്‍ ഹാജരാക്കി റിമാന്‍ഡ് ചെയ്തു.