തിരുന്നാവായ: രൂക്ഷമായ കുടിവെള്ള ക്ഷാമം നേരിടുന്നതിന്റെ ഭാഗമായി വര്‍ഷങ്ങള്‍ക്ക് മുന്‍പ് എടക്കുളം കാദനങ്ങാടി മൂടമ്പാറ പ്രദേശത്ത് ആരംഭിച്ച കുടിവെള്ള പദ്ധതി പഞ്ചായത്ത് അധികൃതരുടെ അനാസ്ഥ മൂലം അനാഥമാകുന്നു.
ഗ്രാമപഞ്ചായത്തിലെ ഏഴ്, എട്ട് വാര്‍ഡുകളിലെ കുടിവെള്ള പ്രശ്‌നം പരിഹരിക്കുന്നതിന് 2005-06 കാലഘട്ടത്തില്‍ നിര്‍മിച്ച പദ്ധതി ഇന്ന് ഗുണഭോക്താക്കള്‍ക്ക് പ്രയോജന പ്രദമല്ലാത്ത രീതിയിലാണ്.
ഇരു വാര്‍ഡിലെയും 75 ഓളം കുടുംബങ്ങളുടെ ആശ്രയമായിരുന്ന പദ്ധതി പഞ്ചായത്ത് അധികൃതര്‍ തിരിഞ്ഞു നോക്കാത്ത അവസ്ഥയിലാണ്. ഇതുമൂലം വലയിപറപ്പൂര്‍ കായല്‍ തീരത്തെ കിണറിന്റെ സമീപത്തെ മോട്ടോപുരയും അനുബന്ധ ഉപകരണങ്ങളും തുരുമ്പെടുത്ത് നശിക്കുകയാണ്. കിണറില്‍ നിന്നും വെള്ളം പമ്പ് ചെയ്യുന്ന ഇരുമ്പ് പൈപ്പും മറ്റും തുരുമ്പെടുത്ത് നശിക്കാന്‍ തുടങ്ങിയിട്ട് ഒരു വര്‍ഷത്തിലധികമായി. ഇത് മാറ്റി സ്ഥാപിക്കണമെന്ന് നിരവധി തവണ നാട്ടുകാര്‍ ആവശ്യപ്പെട്ടിരുന്നുവെങ്കിലും പഞ്ചായത്ത് അധികൃതര്‍ ഒരു നടപടിയും ഇതുവരെ എടുത്തിട്ടില്ലെന്ന് പ്രദേശവാസികള്‍ പറഞ്ഞു.
മോട്ടര്‍ പുരയുടെ വാതിലും മറ്റും നാട്ടുകാരില്‍ ചിലര്‍ സ്വന്തം കീശയില്‍ നിന്ന് പൈസ മുടക്കിയാണ് നന്നാക്കിയിട്ടുള്ളത്. ഇതിന് 4000 രൂപയോളം ചിലവ് വന്നതായി നാട്ടുകാര്‍ പറഞ്ഞു.
ഇനി ഇരുമ്പ് പൈപ്പ് മാറ്റി സ്ഥാപിക്കാന്‍ പഞ്ചായത്ത് തയാറാകണമെന്നാണ് നാട്ടുകാര്‍ ആവശ്യപ്പെടുന്നത്. കടുത്ത വേനലില്‍ കുടിവെള്ള പ്രശ്‌നം നേരിടുന്ന പ്രദേശമാണ് മൂടമ്പാറ.