ജിദ്ദ: സ്വദേശിവത്ക്കരണം നിലവില്‍ വന്ന ജുവലറികളില്‍ 487 നിയമലംഘനങ്ങള്‍ കണ്ടെത്തിയതായി തൊഴില്‍ മന്ത്രാലയം. അഞ്ച് മാസത്തിനിടെ 13,000 ജുവലറികളില്‍ പരിശോധന നടന്നതായും മന്ത്രാലയം വ്യക്തമാക്കി. കഴിഞ്ഞ വര്‍ഷം ഡിസംബര്‍ മുതലാണ് സഊദി അറേബ്യയിലെ ജുവലറികളില്‍ സമ്പൂര്‍ണ സ്വദേശിവത്ക്കരണം നിലവില്‍ വന്നത്.

അഞ്ച് മാസത്തിനിടെ രാജ്യത്തെ 13 പ്രവിശ്യകളില്‍ പ്രവര്‍ത്തിക്കുന്ന 12,923 ജുവലറികളില്‍ തൊഴില്‍ മന്ത്രാലയവും വിവിധ വകുപ്പുകളും പരിശോധന നടത്തി. 487 നിയമലംഘനങ്ങളാണ് ഇവിടങ്ങളില്‍ കണ്ടെത്തിയത്.
പത്തുവര്‍ഷം മുമ്പ് ജുവലറികള്‍ സ്വദേശിവത്ക്കരിക്കാന്‍ തീരുമാനിച്ചിരുന്നെങ്കിലും ഫലപ്രദമായി നടപ്പിലാക്കാന്‍ കഴിഞ്ഞിരുന്നില്ല. അതുകൊണ്ടുതന്നെ ശക്തമായ നടപടികളാണ് തൊഴില്‍ മന്ത്രാലയം സ്വീകരിക്കുന്നത്. ഇതിന് പുറമെ ജുവലറികള്‍ ഉള്‍പ്പെടെയുളള സ്ഥാപനങ്ങളില്‍ തൊഴില്‍ കണ്ടെത്തുന്നതിന് സ്വദേശി യുവാക്കള്‍ക്ക് പരിശീലനം ഉള്‍പ്പെടെയുളള വിവിധ പദ്ധതികളും നടപ്പിലാക്കുന്നുണ്ട്.

സ്വദേശിവത്ക്കരണം കര്‍ശനമാക്കിയതോടെ മലയാളികള്‍ ഉള്‍പ്പെടെ നൂറുകണക്കിന് വിദേശികള്‍ക്ക് തൊഴില്‍ നഷ്ടപ്പെട്ടിരുന്നു. നിയമ ലംഘകര്‍ക്കെതിരെ പിഴ ഉള്‍പ്പെടെ കര്‍ശന ശിക്ഷാ നടപടി സ്വീകരിക്കുമെന്നും തൊഴില്‍ മന്ത്രാലയം മുന്നറിയിപ്പ് നല്‍കി.