കണ്ണൂര്‍: മൂന്നാമത് സംസ്ഥാന ജേര്‍ണലിസ്റ്റ് വോളി ലീഗ് നാളെ മുതല്‍ 28 വരെ കണ്ണൂര്‍ ജവഹര്‍ സ്റ്റേഡിയത്തില്‍ നടക്കും. നാളെ വൈകിട്ട് അഞ്ചിന് പി.കെ ശ്രീമതി എം.പി മത്സരം ഉദ്ഘാടനം ചെയ്യുമെന്ന് സംഘാടക സമിതി ചെയര്‍മാന്‍ ഒ.കെ വിനീഷ് വാര്‍ത്താസമ്മേളനത്തില്‍ അറിയിച്ചു. കണ്ണൂര്‍ സെന്‍ട്രല്‍ ജയില്‍ അന്തേവാസികളും കണ്ണൂര്‍ പ്രസ് ക്ലബ് ടീമും തമ്മിലാണ് ഉദ്ഘാടന മത്സരം. ഇതിന് മുന്നോടിയായി വൈികിട്ട് നാലിന് എക്‌സൈസ് വകുപ്പും കണ്ണൂര്‍ ടൗണ്‍ സ്‌ക്വയര്‍ ടീമും തമ്മിലുള്ള പ്രദര്‍ശന മത്സരം നടക്കും. ഉദ്ഘാടന ചടങ്ങില്‍ രാഷ്ട്രീയ സാമൂഹിക രംഗത്തെ പ്രമുഖര്‍ പങ്കെടുക്കും. 26ന് നടക്കുന്ന വനിതാ വോളിബോള്‍ മത്സരത്തില്‍ കണ്ണൂര്‍ കൃഷ്ണമേനോന്‍ സ്മാരക ഗവ. വനിതാ കോളജും സ്‌പോര്‍ട്‌സ് ഡിവിഷന്‍ കണ്ണൂരും ഏറ്റുമുട്ടും. കണ്ണൂര്‍ റെയ്ഞ്ച് ഐ.ജി ബല്‍റാം കുമാര്‍ ഉപാദ്ധ്യായ മുഖ്യാതിഥിയായിരിക്കും. 

27ന് സിനിമാ താരം അബുസലീം നയിക്കുന്ന ടീമും കണ്ണൂര്‍ ജില്ലാ കലക്ടര്‍ മീര്‍ മുഹമ്മദലി നയിക്കുന്ന കണ്ണൂര്‍ സ്‌പോര്‍ടിങ്ങ് ക്ലബും തമ്മില്‍ ഏറ്റുമുട്ടും. തുടര്‍ന്ന് പ്രസ് ക്ലബുകള്‍ തമ്മിലുള്ള മത്സരങ്ങള്‍ നടക്കും. ടെറിട്ടോറിയല്‍ ആര്‍മി കമാന്‍ഡന്റ് രാജേഷ് കനൂജിയ സംബന്ധിക്കും. സമാപന ദിവസമായ 28ന് മന്ത്രിമാര്‍ ഉള്‍പ്പെടുന്ന രാഷ്ട്രീയ പാര്‍ട്ടി പ്രതിനിധികളും ജില്ലാ പൊലിസ് മേധാവി നയിക്കുന്ന പൊലിസ് ഓഫിസേഴ്‌സ് ടീമും തമ്മിലുള്ള മത്സരം നടക്കും. തുടര്‍ന്ന് ഫൈനല്‍ മത്സരവും അരങ്ങേറും.