മലപ്പുറം: ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥിന്റെ മണ്ഡലത്തിലെ ആശുപത്രിയില്‍ ഓക്‌സിജന്‍ കിട്ടാതെ കുട്ടികള്‍ മരിച്ച സംഭവത്തില്‍ യഥാര്‍ഥ കുറ്റവാളികളെ ബി.ജെ.പി സര്‍ക്കാര്‍ സംരക്ഷിക്കുകയാണെന്ന് മുസ്‌ലിംലീഗ് ദേശീയ ജന. സെക്രട്ടറി പി.കെ കുഞ്ഞാലിക്കുട്ടി എം.പി. ഓക്‌സിജന്‍ സിലിണ്ടര്‍ എത്തിക്കേണ്ട ഉത്തരവാദിത്വം ഡോ. കഫീല്‍ അഹമദ് ഖാന്റേതായിരുന്നില്ല.
ഓക്‌സിജന്‍ വിതരണംചെയ്യുന്ന ഏജന്‍സിയുടെ കുടിശ്ശിക തീര്‍ക്കാന്‍ നിരവധി തവണ ബന്ധപ്പെട്ടവര്‍ ആവശ്യപ്പെട്ടിട്ടും അതിന് തയാറാവാത്ത അധികാരികളാണ് യഥാര്‍ഥ പ്രതികള്‍. സംഭവദിവസം അവധിയായിരുന്നിട്ടും അവധി കാന്‍സല്‍ ചെയ്ത് ജോലിക്കെത്തിയ കഫീല്‍ സ്വന്തംനിലയില്‍ ഓക്‌സിജന്‍ എത്തിച്ചുനല്‍കി കുരുന്നുകളുടെ ജീവന്‍ രക്ഷിക്കാന്‍ നടത്തിയ ശ്രമങ്ങള്‍ മാധ്യമങ്ങള്‍ റിപ്പോര്‍ട്ട് ചെയ്തതാണ്. ഇതാണ് മുഖ്യമന്ത്രി യോഗി ആദിത്യനാഥിനെ പ്രകോപിപ്പിച്ചത്.
ഡോ. കഫീലിനെ ജാമ്യംപോലും നിഷേധിച്ച് ജയിലിലടച്ചിരിക്കുകയാണ്. അദ്ദേഹത്തിന്റെ ആരോഗ്യനില വഷളായിക്കൊണ്ടിരിക്കുകയാണെന്നാണ് വിവരം. കുഞ്ഞുങ്ങളെ കൊലക്ക് കൊടുത്തവര്‍ വിലസുമ്പോള്‍ സ്വന്തംനിലയില്‍ ഓക്‌സിജന്‍ ലഭ്യമാക്കി കുട്ടികളെ ചികിത്സിച്ച ഡോക്ടറെ പീഡിപ്പിക്കുന്നത് ക്രൂരമാണെന്നും കുഞ്ഞാലിക്കുട്ടി പറഞ്ഞു.