കൊച്ചി: വരാപ്പുഴ കസ്റ്റഡി മരണക്കേസില്‍ റിമാന്‍ഡില്‍ കഴിയുന്ന മുന്‍ എസ്.ഐ ദീപക്കിനെ പൊലിസ് കസ്റ്റഡിയില്‍വിട്ടു. പറവൂര്‍ ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതി മൂന്നില്‍ ഇന്നലെ ഹാജരാക്കിയ ദീപക്കിനെ പ്രത്യേക അന്വേഷണ സംഘത്തിന്റെ ആവശ്യപ്രകാരം ആറുദിവസത്തേക്ക് കസ്റ്റഡിയില്‍ വിടുകയായിരുന്നു. കസ്റ്റഡിയില്‍ വാങ്ങിയ ദീപക്കിനെ വരുംദിവസങ്ങളില്‍ കൂടുതല്‍ ചോദ്യം ചെയ്യും.
ശ്രീജിത്തിനെ ദീപക് മൂന്നാംമുറക്ക് വിധേയനാക്കിയെന്നും മറ്റ് പൊലിസുകാരും ഇത്തരത്തില്‍ മര്‍ദിച്ചെന്നും കൂടെ അറസ്റ്റ് ചെയ്യപ്പെട്ടവര്‍ മാധ്യമങ്ങളോട് പറഞ്ഞിരുന്നു. ഇതേത്തുടര്‍ന്ന് ശ്രീജിത്തിനൊപ്പം അറസ്റ്റിലായവരുടെ മൊഴി വീണ്ടും അന്വേഷണ സംഘം രേഖപ്പെടുത്തി. അതേസമയം, കേസില്‍ റിമാന്‍ഡില്‍ കഴിയുന്ന മൂന്ന് റൂറല്‍ ടൈഗര്‍ ഫോഴ്‌സ് അംഗങ്ങളെ കസ്റ്റഡിയില്‍ ലഭിക്കുന്നതിന് അന്വേഷണ സംഘം കോടതിയില്‍ അപേക്ഷ സമര്‍പ്പിച്ചിട്ടുണ്ട്. ഇത് ഇന്ന് പരിഗണിക്കും. കഴിഞ്ഞദിവസം നടത്തിയ തിരിച്ചറിയല്‍ പരേഡില്‍ റൂറല്‍ ടൈഗര്‍ ഫോഴ്‌സ് അംഗങ്ങളായ ജിതിന്‍രാജ്, സുമേഷ്, സന്തോഷ്‌കുമാര്‍ എന്നിവരെ ശ്രീജിത്തിന്റെ അമ്മയും ഭാര്യയും അടക്കമുള്ള സാക്ഷികള്‍ തിരിച്ചറിഞ്ഞിരുന്നു.
കേസില്‍ സസ്‌പെന്‍ഷനിലായ നോര്‍ത്ത് പറവൂര്‍ സി.ഐ ക്രിസ്പിന്‍ സാമിനെ കഴിഞ്ഞ ദിവസം വീണ്ടും ചോദ്യം ചെയ്തിരുന്നു. മരിച്ച ശ്രീജിത്തിന്റെ പോസ്റ്റുമോര്‍ട്ടം റിപ്പോര്‍ട്ട് സംബന്ധിച്ച് പഠിക്കാന്‍ നിയോഗിച്ച മെഡിക്കല്‍ സംഘത്തിന്റെ റിപ്പോര്‍ട്ട് രണ്ടു ദിവസത്തിനകം ലഭിക്കുമെന്നാണ് അന്വേഷണസംഘത്തിന്റെ പ്രതീക്ഷ.