മുക്കം: നിര്‍ദിഷ്ട കൊച്ചി -മംഗലാപുരം ഗെയില്‍ വാതക പൈപ്പ്‌ലൈന്‍ പദ്ധതി അവസാനഘട്ടത്തിലേക്ക് നീങ്ങുന്നു. മലബാറിലും മധ്യകേരളത്തിലും പ്രവൃത്തി ദ്രുതഗതിയില്‍ പുരോഗമിക്കുമ്പോഴും കോഴിക്കോട് ജില്ലയില്‍ പദ്ധതിക്കു വേണ്ടത്ര വേഗത വന്നിട്ടില്ല. തൃശൂര്‍, മലപ്പുറം, കണ്ണൂര്‍, കാസര്‍കോട് ജില്ലകളില്‍ പ്രവൃത്തി അന്തിമഘട്ടത്തിലെത്തി.
പ്രതീക്ഷിച്ച പോലെ ജൂണില്‍ കമ്മിഷന്‍ ചെയ്യാവുന്ന തരത്തിലാണ് ഇവിടങ്ങളില്‍ പ്രവൃത്തി പുരോഗമിക്കുന്നത്. കോഴിക്കോട് ജില്ലയില്‍ 58.54 കിലോമീറ്ററില്‍ 42 കിലോമീറ്റര്‍ ദൂരത്തില്‍ മാത്രമാണ് വെല്‍ഡിങ് ജോലികള്‍ പോലും പൂര്‍ത്തിയായത്. പദ്ധതിയുമായി ബന്ധപ്പെട്ട് കാര്യമായി സംഘര്‍ഷമുണ്ടായത് ജില്ലയിലായിരുന്നു.
സമരസമിതിയുടെ സംസ്ഥാനതല കേന്ദ്രവും ജില്ലയിലെ എരഞ്ഞിമാവാണ്. ഇതാണ് ജില്ലയില്‍ പദ്ധതി ഇഴയാന്‍ കാരണം. ജില്ലയില്‍ 21 കിലോമീറ്റര്‍ ദൂരത്തില്‍ പൈപ്പ്‌ലൈന്‍ സ്ഥാപിക്കലും പൂര്‍ത്തിയായിട്ടുണ്ട്.
തൃശൂര്‍ ജില്ലയില്‍ പദ്ധതി കടന്നുപോകുന്ന 92 കിലോമീറ്ററില്‍ 86 കിലോമീറ്റര്‍ ദൂരത്തില്‍ പൈപ്പ്‌ലൈന്‍ സ്ഥാപിച്ചിട്ടുണ്ട്. കാര്‍ഷിക വിളകള്‍ക്കുള്ള നഷ്ടപരിഹാരം പൂര്‍ണമായും ഭൂമിയുടെ നഷ്ടപരിഹാരം 70 ശതമാനവും വിതരണം ചെയ്ത് കഴിഞ്ഞു.
കണ്ണൂര്‍, കാസര്‍കോട് ജില്ലകളിലും കാലവര്‍ഷത്തിന് മുന്‍പ് പ്രവൃത്തി പൂര്‍ത്തീകരിക്കാനാവുമെന്നാണ് പ്രതീക്ഷ. പദ്ധതി പ്രദേശങ്ങളില്‍ ജനങ്ങളുടെ വലിയ രീതിയിലുള്ള എതിര്‍പ്പ് പദ്ധതിക്ക് തടസമായിരുന്നു. എന്നാല്‍ ഇപ്പോള്‍ കാര്യമായ എതിര്‍പ്പുകള്‍ ഒന്നുംതന്നെയില്ല.
തൃശൂര്‍ മുതല്‍ കാസര്‍കോട് വരെയായി 99 പുഴകളും തോടുകളും കടന്നാണ് പദ്ധതി നടപ്പാക്കുന്നത്. പദ്ധതി കടന്നുപോകുന്ന പ്രദേശങ്ങളില്‍ കോഴിക്കോട് ജില്ലയില്‍ 15 കോടി രൂപയുടെ നഷ്ടപരിഹാരം ആദ്യഘട്ടത്തില്‍ വിതരണം ചെയ്തിരുന്നു.