കൊല്ലം: ഫാസിസത്തിനെതിരെ എല്ലാവരും ഒന്നിച്ച് പോരാടണമെന്ന് പെരുമാള്‍ മുരുകന്‍. അഭിപ്രായ സ്വാതന്ത്ര്യത്തിന് മലയാളികള്‍ നല്‍കി വരുന്ന പിന്തുണ ശ്ലാഘനീയമാണെന്നും അദ്ദേഹം പറഞ്ഞു. സി.പി.ഐ പാര്‍ട്ടി കോണ്‍ഗ്രസിനോട് അനുബന്ധിച്ച് നടന്ന കലാസാംസ്‌കാരിക സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
ആടാനും പാടാനും ചിന്തിക്കാനും പ്രതിരോധിക്കാനുമുള്ള അവകാശങ്ങള്‍ ചോദ്യം ചെയ്യപ്പെടുന്ന ഈ കാലഘട്ടത്തില്‍ കലാകാരന്മാര്‍ സംഘടിക്കേണ്ടത് അനിവാര്യമാണ്. ജാതിമത വര്‍ഗീയ ശക്തികള്‍ ഭരണകൂട പിന്തുണയോടെ നീണ്ടകാല പോരാട്ടങ്ങളിലൂടെ നേടിയെടുത്ത നന്മകളെല്ലാം തച്ചുടയ്ക്കുവാന്‍ ശ്രമം നടത്തുന്നു. കലാകാരന്മാരും സാംസ്‌കാരിക പ്രവര്‍ത്തകരും ഉണര്‍ന്നെണീക്കേണ്ട കാലമാണിതെന്നും അദ്ദേഹം പറഞ്ഞു. സംസ്ഥാന ചലച്ചിത്ര അവാര്‍ഡ് നേടിയ സംഗീത സംവിധായകന്‍ എം.കെ അര്‍ജുനന്‍ മാസ്റ്റര്‍, ചലച്ചിത്ര അവാര്‍ഡ് നേടിയ സംവിധായകന്‍ വി.സി അഭിലാഷ് എന്നിവരെ സി.പി.ഐ സംസ്ഥാന സെക്രട്ടറി കാനം രാജേന്ദ്രന്‍ പൊന്നാടയണിയിച്ച് ആദരിച്ചു.
ചലച്ചിത്ര സംവിധായകന്‍ വിനയന്‍, വള്ളിക്കാവ് മോഹന്‍ദാസ്, ആര്‍.എസ് അനില്‍ സംസസരിച്ചു.