തൃശൂര്‍: പൂരം കൂടി കേന്ദ്രമന്ത്രി അല്‍ഫോണ്‍സ് കണ്ണന്താനം. ബി.ജെ.പി ഓഫിസിലെത്തിയ കേന്ദ്രമന്ത്രിയെ ജില്ലാ പ്രസിഡന്റ് എ.നാഗേഷ് പൂരാശംസകള്‍ നേര്‍ന്ന് സ്വീകരിച്ചു.
തുടര്‍ന്ന് നേതാക്കള്‍ക്ക് ഒപ്പം ശ്രീമൂല സ്ഥാനത്ത് എത്തിയപ്പോള്‍ ഘടക പൂരങ്ങള്‍ കൊട്ടി തിമര്‍ത്ത് വരുന്നു. ഉടനെ പൂരപ്രേമിയായി ചെറുപൂരങ്ങളുടെ ഇടയിലേക്ക്.
കൊമ്പന്‍മാരുടെ ചന്തവും വാദ്യവിസ്മയവും അല്‍പ്പ നേരം ആസ്വദിച്ച ശേഷം സേവാഭാരതിയുടെ നേതൃത്വത്തില്‍ നടക്കുന്ന ഔഷധ കുടിവെള്ള വിതരണത്തില്‍ പങ്കാളിയായി.
ഇതിനിടെ തന്റെ അടുത്തേക്ക് എത്തിയവരോടൊപ്പം സെല്‍ഫിയെടുത്തും പേരു ചോദിച്ചും പൂരപറമ്പിലെ താരമായി. ശ്രീമൂല സ്ഥാനത്ത് നിന്ന് നേരെ മഠത്തില്‍ വരവ് പഞ്ചവാദ്യം നടക്കുന്ന ബ്രഹ്മസ്വം മഠത്തിന് മുന്നിലെ ആളിന്‍ ചുവട്ടിലേക്ക്. വരുന്ന വഴി മുഴുവന്‍ സെല്‍ഫിക്ക് നിന്ന് കൊടുക്കാനും പൂരപ്രേമികളെ അഭിവാദ്യം ചെയ്തുമാണ് നടന്നു നീങ്ങിയത്.
ഇതിനിനടെ ബി.ജെ.പിയുടെ സംഭാര വിതരണ ഉദ്ഘാടനവും. ആലിന്‍ ചുവട്ടില്‍ എത്തിയപ്പോള്‍ മന്ത്രി വി.എസ് സുനില്‍കുമാറും മകനും മഠത്തില്‍ വരവ് പഞ്ചവാദ്യം കാണാന്‍ എത്തിയിരുന്നു.
മന്ത്രിയുമായി കുശലാന്വേഷണം നടത്തുന്നതിനിടെ വാദ്യപെരുമഴക്ക് തുടക്കമായി. കുറെ സമയം പഞ്ചവാദ്യം ആസ്വദിച്ച ശേഷമാണ് അദ്ദേഹം മടങ്ങിയത്.
എ. നാഗേഷ്, എ. ഉണ്ണികൃഷ്ണന്‍, അഡ്വ. കെ.കെ അനീഷ് കുമാര്‍, കെ.പി ജോര്‍ജ്, അഡ്വ. ഉല്ലാസ് ബാബു, ഇ.വി കൃഷ്ണന്‍ നമ്പൂതിരി, സുരേന്ദ്രന്‍ ഐനിക്കുന്നത്ത്, പി. ഗോപിനാഥ്, അഡ്വ. രവികുമാര്‍ ഉപ്പത്ത്, ഇ.എം ചന്ദ്രന്‍ എന്നിവരും അദ്ദേഹത്തോടൊപ്പം ഉണ്ടായിരുന്നു.