തിരുവനന്തപുരം: കാലഹകരണപ്പെടാത്തതും സെലക്ഷന്‍ നടപടികള്‍ പൂര്‍ത്തിയായതുമായ മാതൃലിസ്റ്റുകളില്‍ നിന്ന് അറബി അധ്യാപകരുടെ നിയമനങ്ങള്‍ പി.എസ്.സി ഉടന്‍ പൂര്‍ത്തിയാക്കണമെന്ന് സംസ്ഥാന ന്യൂനപക്ഷ കമ്മിഷന്‍ ഉത്തരവ്. ഉത്തരവിന്റെ അടിസ്ഥാനത്തില്‍ എടുത്ത നടപടി വ്യക്തമാക്കി രണ്ടു മാസത്തിനുള്ളില്‍ പി.എസ്.സി സെക്രട്ടറി റിപ്പോര്‍ട്ട് സമര്‍പ്പിക്കണമെന്നും ന്യൂനപക്ഷ കമ്മിഷന്‍ ചെയര്‍മാന്‍ പി.കെ ഹനീഫയുടെ ഉത്തരവില്‍ നിര്‍ദേശിച്ചു. പി.എസ്.സിയുടെ അലംഭാവം മൂലം സര്‍ക്കാര്‍ സര്‍വിസില്‍ ന്യൂനപക്ഷവിഭാഗങ്ങള്‍ക്ക് സംവരണനഷ്ടം ഉണ്ടാകുന്നുവെന്ന് ചൂണ്ടിക്കാട്ടി മെക്ക ജനറല്‍ സെക്രട്ടറി എന്‍.കെ അലി നല്‍കിയ ഹരജിയിലാണ് കമ്മിഷന്റെ ഉത്തരവ്. പി.എസ്.സി സെക്രട്ടറി കമ്മിഷന്‍ മുന്‍പാകെ നല്‍കിയ വിശദീകരണം നല്‍കിയെങ്കിലും തൃപ്തികരമാകാത്ത സാഹചര്യത്തിലാണ് ഉത്തരവ് പുറപ്പെടുവിച്ചത്.
കേരള സര്‍വിസ് റൂളില്‍ ചട്ടം 15 എയില്‍ പ്രതിപാദിച്ചിട്ടുള്ള വിധം എന്‍.സി.എ നിയമനങ്ങള്‍ക്ക് രണ്ട് വിജ്ഞാപനശേഷവും നിശ്ചിത വിഭാഗത്തില്‍ നിന്ന് ആളെ ലഭ്യമല്ലാതെ വരുമ്പോള്‍ മാതൃലിസ്റ്റിലെ പിന്നോക്ക, എസ്.സി എസ്.ടി വിഭാഗം ഉദ്യോഗാര്‍ഥികള്‍ക്ക് നിയമന ശുപാര്‍ശ നല്‍കാന്‍ പി.എസ്.സി നിയമം വ്യവസ്ഥ ചെയ്തിട്ടുണ്ട്. എന്നാല്‍ ഈ വിഭാഗങ്ങളില്‍ നിന്നുള്ള ഒരു ഉദ്യോഗാര്‍ഥിയും ലഭ്യമല്ലാതെ വരുന്ന സാഹചര്യത്തില്‍ സ്വീകരിക്കേണ്ട നടപടിയെക്കുറിച്ച് ചട്ടത്തില്‍ പ്രതിപാദിക്കുന്നില്ല എന്ന കാരണം പറഞ്ഞ് മാതൃലിസ്റ്റില്‍ നിന്ന് അര്‍ഹരായവര്‍ക്ക് നിയമനം നല്‍കാന്‍ പോലും കമ്മിഷന്‍ തയാറായിരുന്നില്ല. ഇത് ചൂണ്ടിക്കാട്ടിയാണ് ഹരജിക്കാരന്‍ കമ്മിഷനെ സമീപിച്ചത്. സര്‍വിസ് നിയമം മറികടന്നാണ് പി.എസ്.സിയുടെ നടപടിയെന്നും ഹരജിയില്‍ ചൂണ്ടിക്കാട്ടി.
ചട്ടം 14 ബി പാലിക്കേണ്ടതിന് പകരം 20 യൂനിറ്റ് റൊട്ടേഷന്‍ സമ്പ്രദായത്തില്‍ നിയമനം നടത്തുന്നത് മൂലം സംവരണ സമുദായങ്ങളുടെ മെറിറ്റ് നഷ്ടപ്പെടുക്കുകയാണ് ചെയ്യുന്നത്. ഇക്കാരണത്താല്‍ 1958 മുതല്‍ നാളിതുവരെ നടത്തിയിട്ടുള്ള നിയമനങ്ങളില്‍ മുസ്്‌ലിം, ലത്തീന്‍ കത്തോലിക്കര്‍, നാടാര്‍ ക്രിസ്ത്യന്‍, പരിവര്‍ത്തിത ക്രിസ്ത്യാനികളിലെ ന്യൂനപക്ഷങ്ങള്‍ എന്നിവര്‍ക്ക് നിരവധി അവസരങ്ങളും തസ്തികകളും നഷ്ടപ്പെട്ടിട്ടുണ്ടെന്നും ഹരജിയില്‍ ആരോപിച്ചു.