ജിദ്ദ: എണ്ണ വില ബാരലിന് 80 ഡോളറിലെത്തുംവരെ ഉല്‍പാദനം കൂട്ടില്ലെന്ന് സഊദി. സഊദിയുടെ തീരുമാനത്തിനുപിന്നാലെ എണ്ണവില ബാരലിന് 75.47 ഡോളറായി ഉയര്‍ന്നു. ഇതോടെ ഇന്ത്യയടക്കമുള്ള രാജ്യങ്ങളില്‍ വരുംദിവസങ്ങളില്‍ എണ്ണവില കൂടും. 2015ഓടെ ശക്തമായ ഇടിവാണ് എണ്ണവിലയില്‍ ഉണ്ടായത്. അന്നേറ്റ പരുക്കില്‍ നിന്ന് സഊദി ഇതുവരെ മുക്തമായിട്ടില്ല.
എന്നാല്‍, 2014ന് ശേഷമുള്ള ഏറ്റവും ഉയര്‍ന്ന വിലയാണിപ്പോള്‍ എണ്ണയ്ക്കുള്ളത്. വില കൂട്ടുകയല്ല തങ്ങളുടെ ലക്ഷ്യമെന്ന് സഊദി ഊര്‍ജ മന്ത്രി ഖാലിദ് അല്‍ ഫാലിഹ് പറഞ്ഞു. വിപണിയിലെ സന്തുലിതാവസ്ഥ നിലനിര്‍ത്തുകയാണ് ലക്ഷ്യമെന്നും അദ്ദേഹം വ്യക്തമാക്കി.
ഉല്‍പാദന വര്‍ധനവിനെ തുടര്‍ന്ന് 2014 പകുതിയോടെയാണ് എണ്ണ വില കൂപ്പുകുത്തിയത്. വിലയിടിവ് ഗള്‍ഫ് രാജ്യങ്ങളില്‍ ഉണ്ടാക്കിയ സാമ്പത്തിക പ്രതിസന്ധി മറികടക്കാന്‍ ഉല്‍പാദനം കുറയ്ക്കണമെന്ന നിര്‍ദേശമാണ് കഴിഞ്ഞ മാസം സഊദി ഉള്‍പ്പെടെയുള്ള രാജ്യങ്ങള്‍ മുന്നോട്ടുവച്ചിരുന്നത്. ഇതേതുടര്‍ന്ന് എണ്ണ ഉല്‍പാദനം നിയന്ത്രിക്കാന്‍ ഒപെക് തീരുമാനിച്ചിരുന്നു. ഇതിനുപുറമെ ഇറാനെതിരായ ഉപരോധം തുടരാനുള്ള അമേരിക്കയുടെ നീക്കവും എണ്ണ വില ഉയരാന്‍ കാരണമായി.