കണ്ണൂര്‍: നിയമസഭാ തെരഞ്ഞെടുപ്പില്‍ സി.പി.എം കേന്ദ്ര കമ്മിറ്റി അംഗം കെ.കെ ശൈലജയ്ക്ക് സിറ്റിങ് സീറ്റായ മട്ടന്നൂര്‍ നല്‍കില്ല. പകരം പേരാവൂര്‍ സ്ഥാനാര്‍ഥിയാക്കാന്‍ പാര്‍ട്ടി കണ്ണൂര്‍ ജില്ലാ സെക്രട്ടറിയേറ്റ് യോഗം തീരുമാനിച്ചു. തളിപ്പറമ്പില്‍ എം.വി ഗോവിന്ദന്റെ ഭാര്യ പി.കെ ശ്യാമളയും മത്സരിക്കും. മട്ടന്നൂരില്‍ വി.കെ സനോജ് മത്സരിക്കും.

കഴിഞ്ഞ തവണ മട്ടന്നൂരിലായിരുന്നു കെ.കെ ശൈലജ മത്സരിച്ചിരുന്നത്. ശൈലജ പേരാവൂരിലെത്തുമ്പോള്‍ കെ.പി.സി.സി പ്രസിഡന്റ് സണ്ണി ജോസഫാണ് എതിരാളി. സണ്ണി ജോസഫിന്റെ സിറ്റിങ് സീറ്റാണ് പേരാവൂര്‍. 

ALSO READ: ശ്വാസംമുട്ടലിന് ചികിത്സയ്ക്ക് എത്തിയ പെൺകുട്ടിക്ക് എടുത്തത് പേവിഷബാധയ്ക്കുള്ള വാക്സീൻ; സംഭവം ശാസ്താംകോട്ടയിൽ

യു.ഡി.എഫ് പിടിച്ചെടുത്ത പേരാവൂര്‍ മണ്ഡലം തിരിച്ചുപിടിക്കാന്‍ സണ്ണി ജോസഫിനെതിരെ ശൈലജയെ കളത്തിലിറക്കാനാണ് സി.പി.എം നീക്കം. പേരാവൂരില്‍ മത്സരിക്കാന്‍ തയ്യാറെന്ന് കെ.കെ ശൈലജ സി.പി.എം സെക്രട്ടേറിയറ്റില്‍ നിലപാടറിയിച്ചിരുന്നു.

മുഖ്യമന്ത്രി പിണറായി വിജയന് ഒഴികെ, ഉറച്ച സീറ്റുകളില്‍ രണ്ട് ടേം വ്യവസ്ഥ നിര്‍ബന്ധമാക്കിയതോടെയാണ് മട്ടന്നൂരില്‍ നിന്ന് ശൈലജയെ ഒഴിവാക്കാന്‍ നീക്കം നടക്കുന്നത്. സ്ഥാനാര്‍ഥി നിര്‍ണയവുമായി ബന്ധപ്പെട്ട് കഴിഞ്ഞദിവസം തിരുവനന്തപുരത്തു നടന്ന സംസ്ഥാന സെക്രട്ടേറിയറ്റില്‍ മട്ടന്നൂരില്‍ ഡി.വൈ.എഫ്.ഐ നേതാവ് വി.കെ സനോജിന്റെ പേരിനായിരുന്നു മുന്‍തൂക്കം. പേരാവൂരില്‍ കെ.പി.സി.സി പ്രസിഡന്റ് സണ്ണി ജോസഫിനെതിരേ കെ.കെ ശൈലജ മത്സരിക്കുന്നത് ഗുണം ചെയ്യുമെന്നും സംസ്ഥാന നേതൃത്വവും വിലയിരുത്തിയിരുന്നു. 

ALSO READ: ആരോഗ്യമന്ത്രിയെ വധിക്കാൻ ശ്രമിച്ചെന്ന കേസ്: കെഎസ്‌യു പ്രവർത്തകർക്ക് ജാമ്യം നിഷേധിച്ച് കോടതി

ലോക്സഭാ തെരഞ്ഞെടുപ്പില്‍ വടകരയില്‍ നിര്‍ത്തിയതുപോലെ പേരാവൂരിലും തന്നെ ബലിയാടാക്കരുതെന്നായിരുന്നു ശൈലജയുടെ അഭ്യര്‍ഥന. എന്നാല്‍ തുടര്‍ഭരണമെന്ന അമിത ആത്മവിശ്വാസമാണ്, കണ്ണൂര്‍ ജില്ലാ കമ്മിറ്റി നല്‍കിയ സ്ഥാനാര്‍ഥിപ്പട്ടികയില്‍ നിന്ന് ശൈലജയെ വെട്ടാന്‍ സി.പി.എം നേതൃത്വത്തിന് ധൈര്യം നല്‍കുന്നത്. 

Senior CPI(M) leader K. K. Shailaja will not contest from Mattannur and has instead been fielded in the Peravoor constituency in the upcoming Kerala Assembly election. She is set to face Sunny Joseph as her main opponent in what is expected to be a closely watched political battle.