ന്യൂ‍ഡൽഹി: യുഎഇയിൽ നിന്നുള്ള ഇന്ത്യൻ യാത്രികരുടെ സംഘവുമായി സ്‌പൈസ്ജെറ്റ് വിമാനം കൊച്ചിയിലേക്ക് സർവീസ് നടത്തും. കൊച്ചിക്ക് പുറമെ ഡൽഹി, മുംബൈ നഗരങ്ങളിലേക്കും സ്‌പൈസ്ജെറ്റ് ഇന്ന് പ്രത്യേക സർവീസ് നടത്തും. യുഎഇയിലെ ഫുജൈറയിൽ നിന്നാണ് മൂന്ന് നഗരങ്ങളിലേക്കും സർവീസ് നടത്തുക.

ഫുജൈറ – മുംബൈ, ഫുജൈറ – ഡൽഹി സർവീസുകൾ നാളെ (മാർച്ച് 4) മുതൽ സാധാരണനിലയിൽ പ്രവർത്തനം ആരംഭിക്കുമെന്നും സ്പൈസ്‌ജെറ്റ് അറിയിച്ചു. യാത്രക്കാരുടെ ആവശ്യമനുസരിച്ച് അധിക സർവീസുകൾ നടത്താനുള്ള സാധ്യതയും പരിശോധിക്കുന്നുണ്ടെന്ന് സ്പൈസ്‌ജെറ്റ് അധികൃതർ അറിയിച്ചു.

ALSO READ: ഗള്‍ഫ് വിമാന സര്‍വീസുകള്‍ പുനരാരംഭിച്ചു; കൊച്ചിയില്‍ നിന്ന് മസ്‌കത്തിലേയ്ക്ക് വിമാനങ്ങള്‍ പറന്നു തുടങ്ങി

അതേസമയം, കൊച്ചിയിൽ നിന്ന് മസ്‌കത്തിലേക്കുള്ള ഒമാൻ എയർ, എയർ ഇന്ത്യ എക്‌സ്പ്രസ് സർവീസുകൾ ഇന്ന് രാവിലെ മുതൽ പ്രവർത്തനം തുടങ്ങി. ഒമാൻ എയർ ഇന്ന് രാവിലെ 8.10ന് കൊച്ചിയിൽ നിന്ന് പുറപ്പെട്ടു. മസ്‌കത്തിൽ നിന്നുള്ള വിമാനം രാവിലെ 7.40ന് കൊച്ചിയിലെത്തി. എയർ ഇന്ത്യ എക്‌സ്പ്രസ്- വിവിധ ഇന്ത്യൻ നഗരങ്ങളിൽ നിന്ന് ആറ് സർവീസുകൾ നടത്തും. തിരുച്ചിറപ്പള്ളിയിൽ നിന്നും മസ്‌കത്തിലേക്ക് പ്രത്യേക സർവീസുണ്ട്.

അതേസമയം, പശ്ചിമേഷ്യയിലെ സംഘർഷ സാഹചര്യത്തിൽ വിവിധ വിമാനങ്ങൾ റദ്ദാക്കുന്നത് തുടരുകയാണ്. കരിപ്പൂരിൽ നിന്ന് ഇന്ന് നടക്കേണ്ടിയിരുന്ന 40 സർവീസുകൾ റദ്ദാക്കി. കണ്ണൂരിലും വിമാനങ്ങൾ റദ്ദാക്കിയിട്ടുണ്ട്. യുഎഇയിലെ വിമാനത്താവളങ്ങൾ ഭാഗികമായി പ്രവർത്തനം തുടങ്ങിയെങ്കിലും സാധാരണ നിലയിലാകാൻ സമയമെടുക്കും. ബഹ്‌റൈൻ, കുവൈത്ത്, ഖത്തർ, സൗദി അറേബ്യ തുടങ്ങിയ രാജ്യങ്ങളിലേക്കുള്ള സർവീസുകൾ ഇന്ന് രാത്രി 11.59 വരെ താൽക്കാലികമായി നിർത്തിവച്ചിരിക്കുകയാണ്