കോട്ടക്കല്‍: പഠന, തൊഴില്‍ അവസരങ്ങളുടെ ജാലകംതുറന്ന് സുപ്രഭാതം ദിനപത്രവും ദി ബി സ്‌കൂള്‍ ഇന്റര്‍നാഷനലും സംയുക്തമായി സംഘടിപ്പിച്ച കരിയര്‍ ഗൈഡന്‍സ് പ്രോഗ്രാം ശ്രദ്ധേയമായി. കോട്ടക്കല്‍ ചങ്കുവെട്ടി ഡി ഗ്രാന്‍ഡ് ഓഡിറ്റോറിയത്തില്‍ നടന്ന പരിപാടിയില്‍ ഇരുന്നൂറോളം വിദ്യാര്‍ഥികളും അവരുടെ രക്ഷിതാക്കളും പങ്കെടുത്തു.
എസ്.എസ്.എല്‍.സി, പ്ലസ്ടു കോഴ്‌സുകള്‍ പൂര്‍ത്തിയാക്കിയവര്‍ക്കാണ് ക്യാംപ് നടത്തിയത്. വിവിധ സര്‍ക്കാര്‍, അര്‍ധസര്‍ക്കാര്‍, അന്താരാഷ്ട്ര നിലവാരമുള്ള പഠന കോഴ്‌സുകള്‍, തൊഴിലവസരങ്ങള്‍, വ്യക്തിത്വവികാസം, അഭിരുചി പരിജ്ഞാനം, മത്സര പരീക്ഷകള്‍ക്കുള്ള തയാറെടുപ്പുകള്‍ എന്നിവയുമായി ബന്ധപ്പെട്ട സെഷനുകളാണ് ക്യാംപിലുണ്ടായിരുന്നത്.
മലയാളം സര്‍വകലാശാല വൈസ് ചാന്‍സലര്‍ ഡോ. അനില്‍ വള്ളത്തോള്‍ ഉദ്ഘാടനം ചെയ്തു. സുപ്രഭാതം മാനേജിങ് എഡിറ്റര്‍ നവാസ് പൂനൂര്‍ അധ്യക്ഷനായി. ട്രെയിനര്‍മാരായ ടി.എം മന്‍സൂറലി, ഫൈസല്‍ പി. സെയ്ദ്, ആര്‍.കെ മലയത്ത്, പി.വി.എസ് ശിഹാബ് എന്നിവര്‍ വിവിധ സെഷനുകള്‍ നയിച്ചു.
ഷാഹുല്‍ ഹമീദ് മാസ്റ്റര്‍ മേല്‍മുറി സ്വാഗതവും സുപ്രഭാതം റീജ്യനല്‍ മാനേജര്‍ വൈ.പി മുഹമ്മദലി ശിഹാബ് നന്ദിയും പറഞ്ഞു. ബി സ്‌കൂള്‍ ഡയരക്ടര്‍ ശിഹാബുദ്ദീന്‍, സുപ്രഭാതം സ്ട്രാറ്റജി മാനേജര്‍ അബൂബക്കര്‍ സിദ്ദീഖ്, മലപ്പുറം ബ്യൂറോ ചീഫ് സി.പി സുബൈര്‍, സര്‍ക്കുലേഷന്‍ മാനേജര്‍ ഭാസ്‌കരന്‍ ചേലേമ്പ്ര, സലാം കാളമ്പാടി നേതൃത്വം നല്‍കി.