ജനീവ: സ്വിസ് ബാങ്കിലുള്ള  ഇന്ത്യക്കാരുടെ പൂര്‍ണ വിവരങ്ങള്‍ കൈമാറണമെന്ന് മോദി സ്വിറ്റ്‌സര്‍ലാന്റിനോട് ആവശ്യപ്പെട്ടു. കള്ളപ്പണക്കാരെ കണ്ടെത്താന്‍ ഇന്ത്യയുമായി സ്വിറ്റ്‌സര്‍ലാന്റ് സഹകരിക്കാമെന്ന് ഉറപ്പുനല്‍കിയതായി നരേന്ദ്ര മോദി പറഞ്ഞു. ആണവ വിതരണ കൂട്ടായ്മയിലെ (എന്‍.എസ്.ജി) ഇന്ത്യയുടെ അംഗത്വത്തിന് പിന്തുണ നല്‍കാമെന്ന് സ്വിറ്റ്‌സര്‍ലാന്റ് അറിയിച്ചതായും മോദി മാധ്യമങ്ങളോട് പറഞ്ഞു. സ്വിസ് പ്രസിഡന്റ് ജൊഹാന്‍ സ്‌നേഡറുമായുള്ള ചര്‍ച്ചക്കുശേഷമാണ് മോദി ഇക്കാര്യം അറിയിച്ചത്. ഒരു ദിവസത്തെ സന്ദര്‍ശനത്തിനായി ഇന്ന് രാവിലെയാണ് അദ്ദേഹം സ്വിറ്റ്‌സര്‍ലാന്റില്‍ എത്തിയത്. ഖത്തര്‍ സന്ദര്‍ശനത്തിന് ശേഷമാണ് അദ്ദേഹം ഇവിടെ എത്തുന്നത്.അഞ്ച് രാഷ്ട്രങ്ങള്‍ സന്ദര്‍ശിക്കുന്നതിന്റെ ഭാഗമായാണ് മോദി സ്വിറ്റ്‌സര്‍ലാന്റിലെത്തിയത്. അഫ്ഗാനിസ്ഥാനും ഖത്തറുമാണ് മോദി ഇതിനകം സന്ദര്‍ശിച്ചത്. നാളെ അമേരിക്ക സന്ദര്‍ശിക്കുന്ന മോദി വൈറ്റ് ഹൗസില്‍ വച്ച് ഒബാമയുമായി കൂടിക്കാഴ്ച നടത്തും.