തൃശൂര്‍: അരിമ്പൂര്‍, ചേറ്റുപുഴ, മനക്കൊടി ഭാഗങ്ങള്‍ കേന്ദ്രീകരിച്ച് കഞ്ചാവ്, മയക്കുമരുന്ന് ഗുളികകള്‍ എന്നിവ വിതരണം നടത്തി വന്നിരുന്ന യുവാവിനെ തൃശൂര്‍ എക്‌സൈസ് റേഞ്ച് ഇന്‍സ്‌പെക്ടറും സംഘവും ചേര്‍ന്ന് പിടികൂടി. നിരവധി കേസുകളില്‍ പ്രതിയായ ഒളരി തട്ടില്‍ മെല്‍ജോ (19) ആണ് അറസ്റ്റിലായത്.
ഇയാളില്‍ നിന്ന് 1.500 കിലോഗ്രാം കഞ്ചാവും വട്ടുഗുളിക എന്ന പേരിലറിയപ്പെടുന്ന 28 ഗുളികകളും പിടികൂടി. ഇതിനു മുമ്പ് പാലക്കാട് ജില്ലയില്‍ കഞ്ചാവ് കടത്തുന്നതിനിടെ രണ്ടു തവണ ഇയാളെ പിടികൂടിയിട്ടുണ്ട്. ജില്ല കേന്ദ്രീകരിച്ച് മൂന്നു വര്‍ഷത്തോളമായി ഇയാള്‍ കഞ്ചാവ് മൊത്ത വ്യാപാരം നടത്തി വരികയാണെന്നും ഇയാള്‍ ചോദ്യം ചെയ്യലില്‍ സമ്മതിച്ചു.
ക്വട്ടേഷന്‍ സംഘാംഗങ്ങള്‍ക്കും കോളജ് വിദ്യാര്‍ഥികള്‍ക്കും നല്‍കാനാണ് മാനസിക രോഗികള്‍ കഴിക്കുന്ന ഇനത്തില്‍പ്പെടുന്ന ഗുളികകള്‍ കൈവശം വച്ചിരുന്നത്.
തൃശൂര്‍ എക്‌സൈസ് റേഞ്ച് ഇന്‍സ്‌പെക്റ്റര്‍ പത്മകുമാര്‍, പ്രിവെന്റീവ് ഓഫിസര്‍മാരായ റിന്റോ ആന്റണി, തോമസ് ദേവസി, പത്മരാജന്‍, സിവില്‍ എക്‌സൈസ് ഓഫിസര്‍മാരായ ഷിജു വര്‍ഗീസ്, സൈമണ്‍, ഷാജി,സുരേഷ്, ഗിരിധരന്‍, ബിജു, വിനോദ്, സുസ്മി, സജിത എന്നിവരും പങ്കെടുത്തു.