കോട്ടയം: കോട്ടയം താഴത്തങ്ങാടിയിലെ തളിക്കോട്ടപ്പറമ്പില്‍ അംഗന്‍വാടി കെട്ടിടം തകര്‍ന്നു വീണു. വന്‍ ദുരന്തമാണ ഒഴിവായത്. കെട്ടിടം തകര്‍ന്നു വീഴുന്നതിന്റെ അല്‍പം മുമ്പ് കുട്ടികളെ ഇവിടുന്ന് മാറ്റുകയായിരുന്നു. വന്‍ ശബ്ദം കേട്ടതോടെയാണ് അധ്യാപകര്‍ കുട്ടികളെ പെട്ടെന്ന് മാറ്റിയത്. കുട്ടികളെ മാറ്റിയ ഉടനെ കെട്ടിടം വന്‍ ശബ്ദത്തോടെ ഇടിഞ്ഞു വീഴുകയായിരുന്നു. ഇന്ന് രാവിലെ 10 മണിയോടെയായിരുന്നു സംഭവം. മഴയായതിനാല്‍ അല്‍പം കുട്ടികള്‍ മാത്രമാണ് അംഗന്‍വാടിയിലെത്തിയിരുന്നത്. കാലപ്പഴക്കം മൂലം ദ്രവിച്ചാണ് കെട്ടിടം തകര്‍ന്നതെന്ന് കരുതുന്നു. അംഗന്‍വാടിക്കായി പുതിയ കെട്ടിടം നിര്‍മിച്ചിട്ടുണ്ടെങ്കിലും ഇതുവരെ അങ്ങോട്ട് മാറിയില്ല.