കോട്ടയം: താഴത്തങ്ങാടിയില്‍  ഗവ. മുഹമ്മദന്‍ യു.പി സ്‌കൂള്‍ കെട്ടിടം തകര്‍ന്നുവീണു. കുട്ടികള്‍ അദ്ഭുതകരമായി രക്ഷപ്പെട്ടു. ഇന്നലെ രാവിലെ 9.50 ഓടെയാണ് സംഭവം.  50 വര്‍ഷത്തോളം പഴക്കമുള്ള കെട്ടിടമാണ്  പൂര്‍ണമായും നിലംപതിച്ചത്.
സ്‌കൂളില്‍ ഭക്ഷണം പാചകം ചെയ്യാനെത്തിയ ജീവനക്കാരി ശബ്ദം കേട്ട വിവരം ഹെഡ്മാസ്റ്ററെ അറിയിക്കുകയായിരുന്നു. കെട്ടിടത്തിനകത്തുണ്ടായിരുന്ന നാലു കുട്ടികളെ പുറത്തിറക്കുകയും ചെയ്തു. ഇതിനു പിന്നാലെയാണ് മേല്‍ക്കൂരയും ഭിത്തികളും തകര്‍ന്നുവീണത്. ഇവരുടെ അവസരോചിത ഇടപെടല്‍ വന്‍ ദുരന്തം ഒഴിവായി. 15 വര്‍ഷമായി സ്‌കൂള്‍ കെട്ടിടത്തിലാണ് 11 കുട്ടികള്‍ പഠിക്കുന്ന അങ്കണവാടി പ്രവര്‍ത്തിക്കുന്നത്. സ്‌കൂളിനോട് ചേര്‍ന്നു തന്നെയാണ് പാചകപ്പുരയും. നാലു മുറികളുള്ള ഈ ബ്ലോക്ക് പൂര്‍ണമായും തകര്‍ന്നു. മഴയെ തുടര്‍ന്ന് സ്‌കൂളില്‍ കുട്ടികളെത്താന്‍ വൈകിയത്  വലിയ അപകടം ഒഴിവായി. കാലപ്പഴക്കമാണ് കെട്ടിടം തകര്‍ന്നുവീഴാന്‍ കാരണം.