ന്യൂഡല്‍ഹി: രാജ്യത്തെ ലക്ഷക്കണക്കിന് റെയില്‍വേ ജീവനക്കാര്‍ അടുത്തമാസം 11 മുതല്‍ അനിശ്ചിതകാല പണിമുടക്ക്  നടത്തും. പുതിയ പെന്‍ഷന്‍ പദ്ധതി നടപ്പാക്കുക, തൊഴിലാളി വിരുദ്ധനയങ്ങള്‍ പിന്‍വലിക്കുക, ശമ്പളഘടനയില്‍ സമത്വം ഉറപ്പുവരുത്തുക, കുടിശിക കൊടുത്തുതീര്‍ക്കുക, ഏഴാം ശമ്പളക്കമ്മിഷന്‍ ശുപാര്‍ശകള്‍ നടപ്പാക്കുക, ഒഴിവുകള്‍ നികത്തുക എന്നീ ആവശ്യങ്ങള്‍ ഉന്നയിച്ചാണ് സമരം. നാഷനല്‍ ഫെഡറേഷന്‍ ഓഫ് ഇന്ത്യന്‍ റെയില്‍വേമെന്‍ (എന്‍.എഫ്.ഐ.ആര്‍) എന്ന സംഘടനയാണ് സമരം പ്രഖ്യാപിച്ചത്. സമരം രാജ്യമെമ്പാടുമുളള ട്രെയിന്‍ സര്‍വിസുകളെ സാരമായി ബാധിക്കും. 1974 ലാണ് ഇതിനു മുന്‍പ്  റെയില്‍വേ ജീവനക്കാര്‍ അനിശ്ചിതകാല സമരം നടത്തിയത്.