കൊച്ചി: സംസ്ഥാന സ്‌കൂള്‍ കായികമേളയ്ക്ക് ഇന്ന് മെട്രോ നഗരിയില്‍ തിരിതെളിയും. ഒരാഴ്ച നീണ്ടുനില്‍ക്കുന്ന 66ാമത് കായിക മാമാങ്കത്തിന് ഒരിടവേളയ്ക്കുശേഷം കൊച്ചി സാക്ഷ്യംവഹിക്കുമ്പോള്‍ പുതുമകളും പ്രതീക്ഷകളും ഏറെയാണ്. 

വിദേശ സ്‌കൂളുകളിലെ വിദ്യാര്‍ഥികളുടെ പങ്കാളിത്തം, ഭിന്നശേഷിക്കാരായ കുട്ടികളുടെ കായിക മത്സരം, ഒളിംപിക്‌സ് മാതൃകയില്‍ അത്‌ലറ്റിക്‌സ്  ഗെയിംസ് മത്സരങ്ങള്‍, ഏറ്റവും കൂടുതല്‍ പോയിന്റ് നേടുന്ന റവന്യൂ ജില്ലയ്ക്ക് മുഖ്യമന്ത്രിയുടെ എവറോളിങ് ട്രോഫി എന്നിവ ഇത്തവണത്തെ മീറ്റിന്റെ സവിശേഷതകളാണ്. 

കായിക മേളയുടെ ഉദ്ഘാടനം ഇന്ന് വൈകീട്ട് നാലിന് എറണാകുളം മഹാരാജാസ് കോളജ് ഗ്രൗണ്ടില്‍ മന്ത്രി വി. ശിവന്‍കുട്ടി നിര്‍വഹിക്കും. സാംസ്‌കാരിക പരിപാടിയുടെ ഉദ്ഘാടനം ചലച്ചിത്ര താരം മമ്മൂട്ടി നിര്‍വഹിക്കും. വിദ്യാഭ്യാസ മന്ത്രിയും കായികമേള ബ്രാന്‍ഡ് അംബാസഡര്‍ ഒളിംപ്യന്‍ പി.ആര്‍ ശ്രീജേഷും ചേര്‍ന്ന് ദീപശിഖ തെളിയിക്കുന്നതോടെ മേളയ്ക്ക് തുടക്കമാകും. എറണാകുളം ജില്ലയിലെ 17 വേദികളിലായി നടക്കുന്ന മത്സരങ്ങളില്‍ കാല്‍ലക്ഷത്തോളം വിദ്യാര്‍ഥികളാണ് പങ്കെടുക്കുന്നത്. 

3500 വിദ്യാര്‍ഥികള്‍ പങ്കെടുക്കുന്ന മാര്‍ച്ച് പാസ്റ്റും ആലുവ മുതല്‍ ഫോര്‍ട്ട് കൊച്ചി വരെയുള്ള 32 സ്‌കൂളുകളില്‍ നിന്നുള്ള 4,000 വിദ്യാര്‍ഥികള്‍ പങ്കെടുക്കുന്ന സാംസ്‌കാരിക പരിപാടിയും ഉദ്ഘാടന ചടങ്ങിന് മാറ്റുകൂട്ടും. ചാംപ്യന്മാര്‍ക്കുള്ള മുഖ്യമന്ത്രിയുടെ എവറോളിങ് ട്രോഫിയുമായുള്ള ഘോഷയാത്ര ഇന്നലെ എറണാകുളം ജില്ലയില്‍ പര്യടനം നടത്തി. ഇന്ന് രാവിലെ 10ന് തൃപ്പൂണിത്തുറയില്‍ നിന്ന് ആരംഭിക്കുന്ന സംയുക്ത ഘോഷയാത്രയില്‍ ദീപശിഖയും അണിചേരും. ഘോഷയാത്ര ഫോര്‍ട്ടുകൊച്ചി, ഓച്ചന്തുരുത്ത് വഴി ഉച്ചയ്ക്ക് എറണാകുളത്ത് എത്തിച്ചേരും. പിന്നീട് ഉദ്ഘാടന നഗരിയിലേക്ക് ആനയിക്കും.

The 66th Kerala State School Sports Meet kicks off in Kochi today, with thrilling sports events, including international student participation, para-athletic competitions, and Olympic-style athletic games.