കോഴിക്കോട്: സഞ്ചാരി ഫെയ്‌സ്ബുക് കൂട്ടായ്മയുടെ ആഭിമുഖ്യത്തില്‍ നിര്‍ദനരായ വിദ്യാര്‍ഥികള്‍ക്ക് പഠനോപകരണങ്ങള്‍ വിതരണം ചെയ്തു.
വയനാട് ജില്ലയിലെ വിവിധ സ്‌കൂളുകളില്‍ സഞ്ചാരി ഒമാന്‍ യൂനിറ്റിന്റെ ധനസഹായത്തോടെ കോഴിക്കോട്, വയനാട് യൂനിറ്റുകള്‍ സംയുക്തമായാണ് പഠനോപകരണ വിതരണം നടത്തിയത്. പരിപാടിക്കൊപ്പം പരിസ്ഥിതി സംരക്ഷണ സന്ദേശവുമായി മരത്തൈ വിതരണവും നടത്തി.
ബാഗ്, കുട, നോട്ട്ബുക്കുകള്‍, പേന, പെന്‍സില്‍, ഇന്‍സ്ട്രുമെന്റ് ബോക്‌സ്, വാട്ടര്‍ ബോട്ടിലുകള്‍ തുടങ്ങി വിദ്യാര്‍ഥികള്‍ക്ക് ആവശ്യമായ സാധനങ്ങള്‍ ഉള്‍പ്പെടുത്തിയിട്ടുള്ള സമ്പൂര്‍ണ കിറ്റുകളാണ് വിതരണം ചെയ്യുന്നത്.
പരിപാടികള്‍ക്ക് സഞ്ചാരി ഫെയ്‌സ്ബുക്ക് കൂട്ടായ്മയുടെ വിവിധ യൂനിറ്റുകള്‍ക്ക് വേണ്ടി അഭിഷേക് രാജ്, മുനീര്‍ ഹുസൈന്‍, സുനീഷ്, ഹരിപ്രസാദ്, അനില്‍ ശ്യാം, വിഷ്ണു, രാഹുല്‍, കിരണ്‍ തുടങ്ങിയവര്‍ നേതൃത്വം നല്‍കി.