കോഴിക്കോട്: ലോക്‌സഭാ തെരഞ്ഞെടുപ്പിന്റെ തയാറെടുപ്പിലേക്ക് കോണ്‍ഗ്രസ്. നേരത്തെ യു.ഡി.എഫിന്റെ നേതൃത്വത്തില്‍ തെരഞ്ഞെടുപ്പ് കണ്‍വന്‍ഷന്‍ ചേര്‍ന്നുവെങ്കിലും ഇപ്പോള്‍ കോണ്‍ഗ്രസ് ആസൂത്രിതമായ തെരഞ്ഞെടുപ്പ് ഒരുക്കത്തിലേക്ക് കടക്കുകയാണ്. ഇതിന്റെ ആദ്യപടിയായി നാലിന് എ.ഐ.സി.സി ജനറല്‍ സെക്രട്ടറി മുകുള്‍ വാസ്‌നിക് കോഴിക്കോട്ടെത്തും.  ഡി.സി.സിയില്‍ രാവിലെ 10ന് നടക്കുന്ന പാര്‍ലമെന്റ് തെരഞ്ഞെടുപ്പ് മുന്നൊരുക്കത്തിന്റെ ഭാഗമായുള്ള നേതൃസംഗമം മുകുള്‍ വാസ്‌നിക് ഉദ്ഘാടനം ചെയ്യും. കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍ എം.പി അടക്കമുള്ള നേതാക്കള്‍ നേതൃസംഗമത്തില്‍ പങ്കെടുക്കുന്നുണ്ട്. ഇതിനു പിന്നാലെ ജില്ലയിലെ മുഴുവന്‍ മണ്ഡലം കമ്മിറ്റികളുടെയും നേതൃത്വത്തില്‍ പദയാത്രകളും ജനുവരിയില്‍ സംഘടിപ്പിക്കുന്നുണ്ട്.
കോഴിക്കോട് എം.പി എം.കെ രാഘവനെതിരേ സി.പി.എം നടത്തുന്ന പ്രചാരണങ്ങളെ ചെറുക്കാനുള്ള നീക്കങ്ങളും കോണ്‍ഗ്രസ് ആരംഭിച്ചിട്ടുണ്ട്. എം.കെ രാഘവന്‍ കോഴിക്കോട് മണ്ഡലത്തില്‍ നടത്തിയ വികസന പ്രവര്‍ത്തനങ്ങള്‍ ഉയര്‍ത്തിക്കാട്ടി പ്രചാരണവുമായി മുന്നോട്ടുപോകാനാണു കോണ്‍ഗ്രസ് നീക്കം.
കഴിഞ്ഞ ദിവസം നഗരത്തിലെ മേല്‍പാലങ്ങളുടെ ഉദ്ഘാടനത്തിനായി കോഴിക്കോട്ടെത്തിയ മന്ത്രി ജി. സുധാകരന്‍ എം.പിയെ വിമര്‍ശിച്ചിരുന്നു. വികസന പ്രവര്‍ത്തനങ്ങള്‍ക്കു നേതൃത്വം കൊടുക്കുന്നതിനു പകരം ചര്‍ച്ച നടത്തുന്ന എം.പിയാണ് എം.കെ രാഘവനെന്നായിരുന്നു മന്ത്രിയുടെ വിമര്‍ശനം. എന്നാല്‍ കഴിഞ്ഞ ഒന്‍പതര വര്‍ഷത്തിനിടെ എം.പി കോഴിക്കോട്ട് കൊണ്ടുവന്ന വികസനത്തെ അക്കമിട്ടു നിരത്തിയാണ് ഡി.സി.സി പ്രസിഡന്റ് ടി. സിദ്ദീഖ് ഇതിനെ ഖണ്ഡിക്കുന്നത്. എം.പിയെ മേല്‍പാല ഉദ്ഘാടന ചടങ്ങില്‍ നിന്ന് മാറ്റിനിര്‍ത്തിയത് അദ്ദേഹത്തിന്റെ ജനകീയതയെ സി.പി.എം ഭയന്നിട്ടാണെന്നും സിദ്ദീഖ് ആരോപിക്കുന്നുണ്ട്.
44.5 കോടി രൂപ മുടക്കി കോഴിക്കോട് മെഡിക്കല്‍ കോളജില്‍ ആരംഭിച്ച ത്രിതല കാന്‍സര്‍ സെന്റര്‍, ഇംഹാന്‍സിന് 30 കോടി നേടിയെടുക്കാനായതും കോഴിക്കോട് മെഡിക്കല്‍ കോളജിനായി 120 കോടിയുടെ കേന്ദ്ര സഹായം നേടിയെടുക്കാന്‍ കഴിഞ്ഞതും മികവിന്റെ കേന്ദ്രമാക്കിയതയും കൂടുതല്‍ രോഗികള്‍ക്ക് സഹായകരമായ വിധത്തില്‍ കോളജില്‍ 1.62 കോടിയുടെ പദ്ധതിയായി ഡയാലിസിസ് മെഷിനുകളുടെ എണ്ണം ഇരട്ടിയാക്കിയതും കോഴിക്കോട് റെയില്‍വേ സ്റ്റേഷനെയും വിമാനത്താവളത്തെയും അന്താരാഷ്ട്ര നിലവാരത്തിലേക്ക് ഉയര്‍ത്തിയതും എം.പിയുടെ വികസന നേട്ടങ്ങളായിട്ടാണ് കോണ്‍ഗ്രസ് ഉയര്‍ത്തിക്കാട്ടുന്നത്.
വടകരയില്‍ മുല്ലപ്പള്ളി രാമചന്ദ്രനും വയനാട്ടില്‍ എം.ഐ ഷാനാവാസും നടത്തിയ വികസന പ്രവര്‍ത്തനങ്ങള്‍ തന്നെയാണു കോണ്‍ഗ്രസിന്റെയും യു.ഡി.എഫിന്റെയും തുറുപ്പുചീട്ട്. വടകരയില്‍ കടുത്ത മത്സരം പ്രതീക്ഷിക്കുന്ന സാഹചര്യത്തില്‍ കരുതലോടെയായിരിക്കും കോണ്‍ഗ്രസ് നീക്കം നടത്തുക.