മണ്ണാര്‍ക്കാട്: സംസ്ഥാനത്ത് കോണ്‍ഗ്രസിന്റെ അടിത്തറയിളക്കിയുളള പരാജയം സംഭവിച്ച തിരഞ്ഞെടുപ്പാണ് കഴിഞ്ഞുപോയതെന്ന് കെ.പി.സി.സി വൈസ് പ്രസിഡന്റ് വി.ഡി സതീഷന്‍ എം.എല്‍.എ പറഞ്ഞു. മണ്ണാര്‍ക്കാട് നടന്ന പി. ബാലന്‍ സ്മാരക സമിതിയുടെ പുരസ്‌കാരം ഏറ്റുവാങ്ങി സംസാരിക്കുകയായിരുന്നു അദ്ദേഹം. മൂന്നാമതൊരു ശക്തിയുടെ ഉദയത്തിന് കാരണമായ തിരഞ്ഞെടുപ്പിന്റെ യഥാര്‍ഥ കാരണങ്ങള്‍ കണ്ടെത്തി ഇനി എങ്ങിനെ നേരിടാമെന്നാണ് ആലോചിക്കേണ്ടതെന്നും വി.ഡി സതീഷന്‍ കൂട്ടിച്ചേര്‍ത്തു.
രോഗം മൂടിവെക്കാതെ ശരിയായ രോഗം കണ്ടെത്തി ചികിത്സിക്കുകയാണ് വേണ്ടത്. പി. ബാലനെ പോലെയുളള നിര്‍ഭയനായ നേതാവിന്റെ അഭാവമുണ്ടെന്നും സതീഷന്‍ പറഞ്ഞു. ചടങ്ങ് മുന്‍മന്ത്രി ആര്യാടന്‍ മുഹമ്മദ് ഉദ്ഘാടനം ചെയ്തു. പി. ബാലന്‍ സ്മാരകാ സമിതി ചെയര്‍മാന്‍ പി.ജെ പൗലോസ് അധ്യക്ഷത വഹിച്ചു. പി. ബാലന്‍ സ്മാരക പുരസ്‌കാരം വി.ഡി സതീഷന്‍ എം.എല്‍.എക് ആര്യാടന്‍ മുഹമ്മദ് നല്‍കി.
പ്രൊ.പി.എ വാസുദേവന്‍ അവാര്‍ഡ് വിശദീകരണം നടത്തി. അഡ്വ.എന്‍ ഷംസുദ്ദീന്‍ എം.എല്‍.എ, ഡി.സി.സി പ്രസിഡന്റ് സി.വി ബാലചന്ദ്രന്‍, മുന്‍ എം.പി വി.എസ് വിജരാഘവന്‍, കെ.എ ചന്ദ്രന്‍, യു.ഡി.എഫ് ചെയര്‍മാന്‍ എ. രാമസ്വാമി, മലപ്പുറം ഡി.സി.സി സെക്രട്ടറി വി.എ കരീം, കെ.പി.സി.സി സെക്രട്ടറി സി. ചന്ദ്രന്‍, ബ്ലോക്ക് കോണ്‍ഗ്രസ് പ്രസിഡന്റ് വി.വി ഷൗക്കത്തലി, എ. അസൈനാര്‍ എന്നിവര്‍ സംസാരിച്ചു.