ന്യൂഡല്‍ഹി: തിഹാര്‍ ജയിലില്‍ക്കഴിയുന്ന ഭീം ആര്‍മി നേതാവ് ചന്ദ്രശേഖര്‍ ആസാദിന്റെ ആരോഗ്യനില മോശമാണെന്നും ഏതുനിമിഷവും ഹൃദയാഘാതം വരെയുണ്ടാകാന്‍ സാധ്യതയുണ്ടെന്നും ആസാദിന്റെ ഡോ. ഹര്‍ജിത് സിങ് ഭാട്ടി. ചികിത്സയ്ക്കായി ആസാദിനെ എയിംസില്‍ അഡ്മിറ്റ് ചെയ്യണമെന്ന് ഡല്‍ഹി പൊലിസിനോടും ആഭ്യന്തരമന്ത്രി അമിത്ഷായോടും ആവശ്യപ്പെട്ടിട്ടും അതിന് തയാറായില്ലെന്നും ഭാട്ടി ട്വിറ്ററില്‍ കുറിച്ചു.
രക്തസംബന്ധമായ രോഗമുള്ള ആസാദിന്റെ രക്തം രണ്ടാഴ്ചയിലൊരിക്കല്‍ മാറ്റേണ്ടതുണ്ട്. എയിംസിലെ രക്തപ്രതിപാദനശാഖാ വിഭാഗത്തില്‍ ഒരു വര്‍ഷമായി ഇതിനുള്ള ചികിത്സയിലാണ് ആസാദ്. അതു ചെയ്തില്ലെങ്കില്‍ രക്തം കട്ടിയാകുകയും അതുമൂലം ഹൃദയാഘാതമോ സ്‌ട്രോക്കോ ഉണ്ടാകാനുള്ള സാധ്യതയുണ്ട്. തന്റെ രോഗാവസ്ഥയെക്കുറിച്ച് പൊലിസിനോട് ആസാദ് പലതവണ പറഞ്ഞതാണെന്നും എന്നാല്‍ പൊലിസ് ചെവികൊണ്ടില്ലെന്നും ഡോക്ടര്‍ പറയുന്നു. അദ്ദേഹത്തിന് ചികിത്സ നിഷേധിക്കുന്നത് മനുഷ്യാവകാശ ലംഘനമാണെന്നും ഡോ. ഹര്‍ജിത് സിങ് ഭാട്ടി പറഞ്ഞു. ഡല്‍ഹി ജുമാമസ്ജിദില്‍ പൗരത്വ നിയമ ഭേദഗതിക്കെതിരായ സമരത്തിന് നേതൃത്വം നല്‍കിയതിന് ഡിസംബര്‍ 21നാണ് ആസാദിനെ പൊലിസ് അറസ്റ്റ് ചെയ്തത്. ദരിയാഗഞ്ചില്‍ അക്രമമുണ്ടാക്കിയെന്ന കള്ളക്കേസ് ചുമത്തിയായിരുന്നു അറസ്റ്റ്.