ചെന്നൈ: തലമുടി മാറ്റിവെക്കല്‍ ശസ്ത്രക്രിയയ്ക്ക് വിധേയനായ വിദ്യാര്‍ഥി മരിച്ചു. അവസാന വര്‍ഷ മെഡിക്കല്‍ വിദ്യാര്‍ഥിയായ ചെന്നൈ സ്വദേശി സന്തോഷ് ആണ് മരിച്ചത്. ചെന്നൈ അഡ്വാന്‍സ്ഡ് റോബോട്ടിക് ഹെയര്‍ ട്രാന്‍സ്പ്ലാന്റ് സെന്ററിലാണ് സംഭവം.

കഷണ്ടി മാറ്റാനായിട്ടാണ് സന്തോഷ് പത്തു മണിക്കൂറോളം നീണ്ട ശസ്ത്രക്രിയയ്ക്ക് വിധേയനായത്. ശസ്ത്രക്രിയ കഴിഞ്ഞ ഉടന്‍ തന്നെ സന്തോഷിന് പനി ബാധിച്ചു. പിന്നീട് നില വഷളാവുകയും മൂന്നാം ദിവസം സന്തോഷ് മരണപ്പെടുകയും ചെയ്തു.

ശസ്ത്രക്രിയ നടത്തിയതില്‍ അപാകതയുണ്ടെന്നും നടത്തിയവര്‍ വ്യാജ ഡോക്ടര്‍മാരാണെന്നും സന്തോഷിന്റെ മാതാപിതാക്കള്‍ ആരോപിച്ചു. 73000 രൂപയാണ് ശസ്ത്രക്രിയയ്ക്ക് ചിലവായത്. പണമുണ്ടാക്കുക മാത്രമാണ് ഇവരുടെ ലക്ഷ്യം മനുഷ്യരുടെ ജീവന് ഇവര്‍ വില കല്‍പ്പിക്കുന്നില്ലെന്നും മാതാപിതാക്കള്‍ പറഞ്ഞു. ശസ്ത്രക്രിയ നടത്തിയ ഡോക്ടര്‍മാര്‍ സംഭവത്തിനു ശേഷം ഒളിവിലാണ്.
അതേസമയം, സെന്ററിന് ഹെയര്‍ സലൂണ്‍ നടത്താനുള്ള ലൈസന്‍സ് മാത്രമേ ഉണ്ടായിരുന്നുള്ളൂവെന്ന് അധികൃതര്‍ വ്യക്തമാക്കി. ലൈസന്‍സ് കാലാവധി ഏപ്രിലില്‍ അവസാനിച്ചിരുന്നവെന്നും അധികൃതര്‍ പറഞ്ഞു. മാതാപിതാക്കളുടെ പരാതിയില്‍ സ്ഥാപനം സീല്‍ ചെയ്ത് പൂട്ടിയിട്ടുണ്ട്.