തിരുവനന്തപുരം: ചര്‍ച്ചകളിലെ തീരുമാനങ്ങള്‍ നടപ്പിലാക്കാതെ പ്രകോപനം സൃഷ്ടിച്ചത് മുത്തൂറ്റ് മാനേജ്‌മെന്റാണെന്നും എം.ഡിക്കെതിരേ തൊഴിലാളികളാണോ കല്ലെറിഞ്ഞതെന്ന് വ്യക്തമായിട്ടില്ലെന്നും മന്ത്രി ടി.പി രാമകൃഷ്ണന്‍. മാനേജ്‌മെന്റും തൊഴിലാളികളും സഹകരിച്ചു പോകണമെന്നും ചര്‍ച്ചയില്‍ മാനേജ്‌മെന്റ് ഏകപക്ഷീയ നിലപാടാണ് കൈക്കൊണ്ടതെന്നും മന്ത്രി തിരുവനന്തപുരത്ത് വാര്‍ത്താസമ്മേളനത്തില്‍ പറഞ്ഞു.
മുത്തൂറ്റ് ഗ്രൂപ്പിലെ പ്രശ്‌നങ്ങള്‍ ഹൈക്കോടതി നിരീക്ഷകന്റെ മധ്യസ്ഥതയില്‍ പരിഹരിച്ചതാണ്. എടുക്കുന്ന തീരുമാനങ്ങള്‍ നടപ്പിലാക്കാതെ മാനേജമെന്റ് പ്രശ്‌നങ്ങള്‍ സൃഷ്ടിച്ചു കൊണ്ടിരിക്കുകയാണ്. അടച്ചുപൂട്ടിയ ബ്രാഞ്ചുകള്‍ തുറക്കണം. പിരിച്ചുവിട്ടവരെ തിരിച്ചെടുക്കണം എന്നതാണ് സര്‍ക്കാര്‍ നിലപാട്. എന്നാല്‍ മാനേജ്‌മെന്റിന്റെ നിലപാട് അനുകൂലമായിരുന്നില്ല.
മാനേജ്‌മെന്റും തൊഴിലാളികളും സഹകരിച്ചു പോകണം. തൊഴിലാളി-തൊഴിലുടമ സഹകരണം കേരളത്തില്‍ ശക്തിപ്പെട്ടിട്ടുണ്ട്. പ്രശ്‌നം രമ്യമായി പരിഹരിക്കാന്‍ സര്‍ക്കാര്‍ തയാറാണ്. മുത്തൂറ്റ് കമ്പനി തൊഴിലാളികള്‍ സമാധാനപരമായാണ് സമരം നടത്തിയതെന്ന് മന്ത്രി വ്യക്തമാക്കി.