ചെന്നൈ: ഡി.എം.കെ അധ്യക്ഷനായിരുന്ന എം. കരുണാനിധി അന്തരിച്ചതിനെ തുടര്‍ന്ന് ഒഴിവുവന്ന തിരുവാരൂര്‍ നിയമസഭാ മണ്ഡലത്തിലേക്ക് നടക്കുന്ന ഉപതെരഞ്ഞെടുപ്പ് തമിഴ്‌നാട് രാഷ്ട്രീയത്തില്‍ നിര്‍ണായകം. പാര്‍ട്ടി അധ്യക്ഷനായിരുന്ന കരുണാനിധിയുടെ മണ്ഡലം സംരക്ഷിക്കുകയെന്ന ഭാരിച്ച ഉത്തരവാദിത്തമാണ് ഡി.എം.കെക്കുള്ളതെങ്കില്‍ ഭരണവിരുദ്ധ വികാരം സംസ്ഥാനത്തില്ലെന്ന് തെളിയിക്കാന്‍ അണ്ണാ ഡി.എം.കെക്ക് വിജയം അനിവാര്യമാണ്. എന്നാല്‍ ഭരണകക്ഷിക്കെതിരായ നീക്കത്തില്‍ വിജയം തങ്ങള്‍ക്കു വേണമെന്ന നിലപാടിലാണ് ടി.ടി.വി ദിനകരന്റെ പാര്‍ട്ടിയായ എ.എം.എം.കെ.

ഈ മാസം 28നാണ് തിരുവാരൂര്‍ ഉപതെരഞ്ഞെടുപ്പ് നടക്കുന്നത്. മണ്ഡലത്തില്‍ മത്സരിക്കാന്‍ താല്‍പര്യം പ്രകടിപ്പിച്ചുകൊണ്ട് 52 പേര്‍ അപേക്ഷ നല്‍കിയിട്ടുണ്ടെന്ന് അണ്ണാ ഡി.എം.കെ അറിയിച്ചു.
അതേസമയം, ഡി.എം.കെ സ്ഥാനാര്‍ഥിയെ ഇന്നലെ പ്രഖ്യാപിച്ചു. പാര്‍ട്ടിയുടെ തിരുവാരൂര്‍ ജില്ലാ സെക്രട്ടറി പൂണ്ഡി കെ. കലൈവാണനാണു ജനവിധി തേടുന്നത്. പാര്‍ട്ടി അധ്യക്ഷന്‍ എം.കെ സ്റ്റാലിനാണു പ്രഖ്യാപനം നടത്തിയത്. നേരത്തെ എം.കെ സ്റ്റാലിനെ മത്സരിപ്പിക്കണമെന്ന ആവശ്യം ശക്തമായിരുന്നെങ്കിലും അദ്ദേഹം അംഗീകരിച്ചിരുന്നില്ല. ഇതിനു പിറകെയാണു സ്ഥാനാര്‍ഥിയെ പ്രഖ്യാപിച്ചത്.

എ.എം.എം.കെ തിരുവാരൂര്‍ ജില്ലാ സെക്രട്ടറി കാമരാജിനെ സ്ഥാനാര്‍ഥിയായി ടി.ടി.വി ദിനകരന്‍ പ്രഖ്യാപിച്ചു.