ന്യൂഡല്‍ഹി: ഓള്‍ ഇന്ത്യ റേഡിയോയുടെ ദേശീയ ചാനല്‍ സംപ്രേഷണം നിര്‍ത്തുന്നു. ഇതു സംബന്ധിച്ചുള്ള പ്രസാര്‍ഭാരതിയുടെ ഉത്തരവ് പുറത്തുവന്നു. ദേശീയ ചാനലിനു പുറമെ രാജ്യത്തെ അഞ്ചു നഗരങ്ങളിലായി പ്രവര്‍ത്തിക്കുന്ന മേഖലാ പരിശീലന അക്കാദമിയുടെ പ്രവര്‍ത്തനവും നിര്‍ത്താന്‍ തീരുമാനിച്ചിട്ടുണ്ട്.
ദേശീയ ചാനലും, തിരുവനന്തപുരം, അഹമ്മദാബാദ്, ഹൈദരാബാദ്, ലഖ്‌നൗ, ഷില്ലോങ് എന്നീ നഗരങ്ങളില്‍ പ്രവര്‍ത്തിക്കുന്ന ബ്രോഡ്കാസ്റ്റിങ് ആന്‍ഡ് മള്‍ട്ടിമീഡിയാ അക്കാദമിയും എത്രയും പെട്ടെന്നു നിര്‍ത്താനാണ് പ്രസാര്‍ഭാരതി ഉത്തരവിട്ടത്. ചെലവു ചുരുക്കലിന്റെ ഭാഗമായാണു നടപടിയെന്നാണു വിശദീകരണം. ബന്ധപ്പെട്ട ജീവനക്കാരെ പുനഃക്രമീകരിക്കാനും തീരുമാനിച്ചിട്ടുണ്ട്. ഇവര്‍ക്ക് ആവശ്യമായ സ്ഥലത്തേക്കു മാറ്റത്തിന് അപേക്ഷിക്കാമെന്ന് പ്രസാര്‍ഭാരതി അറിയിച്ചു.