പാപ്പിനിശ്ശേരി: ഒന്നര പതിറ്റാണ്ട് മുന്‍പ് പിരിച്ചുവിട്ട പാപ്പിനിശ്ശേരി കോട്ടണ്‍സിലെ തൊഴിലാളികള്‍ ആനുകൂല്യം തേടി പ്രക്ഷോഭത്തിനൊരുങ്ങുന്നു. ഇതിന്റെ ഭാഗമായി കോട്ടണ്‍സ് തൊഴിലാളികളുടെ വിപുലമായ കണ്‍വന്‍ഷന്‍ ആറിനു വൈകിട്ട് 3ന് പാപ്പിനിശ്ശേരി ആറോണ്‍ യു.പി. സ്‌കൂളില്‍ നടത്തും.
2003 ജൂണ്‍ മുതല്‍ ഘട്ടംഘട്ടമായി ഓരോ വിഭാഗത്തിലും പ്രവൃത്തി നിറുത്തിവെച്ച് 2004 സപ്തംബറോടു കൂടിയാണ് പൂര്‍ണമായി കമ്പനിയുടെ പ്രവര്‍ത്തനം സ്തംഭിച്ചത്. കമ്പനി അടച്ചു പൂട്ടുകയാണെന്ന് തൊഴിലാളികളോട് പറയാതെ കൈയൊഴിഞ്ഞു. ഗ്രാറ്റിവിറ്റി ഇനത്തില്‍ അര്‍ഹതപ്പെട്ട ആനുകൂല്യം പോലും ലഭിക്കാതെയാണ് തൊഴിലാളികള്‍ പിരിഞ്ഞ് പോകേണ്ടി വന്നത്. തൊഴിലാളികള്‍ക്ക് നിലവില്‍ ആയിരം രൂപയോ അതില്‍ താഴെയോ ആണ് നാമമാത്ര പെന്‍ഷന്‍ ലഭിക്കുന്നത്. അതിനാല്‍ ഏറ്റവും നല്ല നിലയില്‍ പ്രവര്‍ത്തിക്കുകയും കമ്പനിക്ക് വേണ്ടി പതിറ്റാണ്ടുകളോളം ജോലി ചെയ്യുകയും ചെയ്ത തൊഴിലാളികള്‍ക്ക് അര്‍ഹമായ ആനുകൂലം ലഭ്യമാക്കുന്നതിനായി സര്‍ക്കാരില്‍ സമ്മര്‍ദ്ദം ചെലുത്തുന്നതിനുള്ള ആദ്യപടി എന്ന നിലയിലാണ് കണ്‍വന്‍ഷന്‍ നടത്തുന്നതെന്നും വാര്‍ത്താ സമ്മേളനത്തില്‍ പങ്കെടുത്ത എം. നിത്യാദാസ്, പി. ചന്ദ്രന്‍, കെ.വി ജനാര്‍ദ്ദനന്‍, ടി. പവിത്രന്‍, കെ. ചന്ദ്രന്‍, ഇ.വി. ജനാര്‍ദനന്‍ എന്നിവര്‍ വാര്‍ത്താ സമ്മേളനത്തില്‍ അറിയിച്ചു.