ന്യൂഡൽഹി: ടെമ്പോയുടെ മുൻ സീറ്റിൽ ആര് ഇരിക്കുമെന്നതിനെച്ചൊല്ലിയുള്ള തർക്കത്തെത്തുടർന്ന് മകൻ പിതാവിനെ വെടിവെച്ച് കൊന്നു. വടക്കൻ ഡൽഹിയിലെ തിമാർപൂർ പ്രദേശത്താണ് ഞെട്ടിക്കുന്ന സംഭവം ഉണ്ടായത്. സിഐഎസ്എഫിൽ നിന്ന് വിരമിച്ച സബ് ഇൻസ്പെക്ടറായ സുരേന്ദ്ര സിങ് (60) ആണ് മരിച്ചത്. സംഭവത്തിൽ 26 വയസ്സുള്ള മകൻ ദീപക്കിനെ പൊലിസ് അറസ്റ്റ് ചെയ്തു. വ്യാഴാഴ്ച വൈകുന്നേരം ഉത്തരാഖണ്ഡിലെ സ്വന്തം ഗ്രാമത്തിലേക്ക് താമസം മാറാൻ ഒരുങ്ങുന്നതിനിടെയാണ് ദുരന്തമുണ്ടായത്.

വാടകയ്‌ക്കെടുത്ത ഒരു ടെമ്പോയുടെ മുൻ സീറ്റിൽ ആര് ഇരിക്കുമെന്നതിനെച്ചൊല്ലിയുള്ള തർക്കമാണ് ദാരുണ സംഭവത്തിലേക്ക് വഴിമാറിയത്. തിമാർപൂരിലെ എംഎസ് ബ്ലോക്കിന് സമീപം വൈകുന്നേരം 7.30 ഓടെയാണ് സംഭവം. വെടിയൊച്ച കേട്ട് പട്രോളിംഗ് നടത്തുകയായിരുന്ന പൊലിസ് ഉദ്യോഗസ്ഥർ സ്ഥലത്തെത്തിയപ്പോൾ 60 കാരനായ സുരേന്ദ്ര സിംഗ് രക്തത്തിൽ കുളിച്ച് കിടക്കുന്നത് കണ്ടെത്തി. നാട്ടുകാർ ചേർന്നാണ് ദീപക്കിനെ പിടിച്ച് പൊലിസിന് ഏൽപ്പിച്ചത്.

റിട്ടയേർഡ് സബ് ഇൻസ്പെക്ടറായ സുരേന്ദ്ര സിങ്ങിനെ എച്ച്ആർഎച്ച് ആശുപത്രിയിലേക്ക് കൊണ്ടുപോയെങ്കിലും ജീവൻ രക്ഷിക്കാനായില്ല. വെടിയുണ്ട ഇടതു കവിളിലൂടെ തുളച്ചുകയറി മുഖത്ത് ഗുരുതരമായി പരുക്കേറ്റിരുന്നു.

ALSO READ: ഇസ്‌റാഈലിനെ ലഷ്യം വെച്ച് യെമന്റെ മിസൈൽ ആക്രമണം; സൈറൺ മുഴക്കി മുന്നറിയിപ്പ്

ആറ് മാസം മുൻപാണ് സുരേന്ദ്ര സിംഗ് വിരമിച്ചത്. ഇതിന് പിന്നാലെ കുടുംബം ഉത്തരാഖണ്ഡിലേക്ക് താമസം മാറാനുള്ള ഒരുക്കത്തിലായിരുന്നുവെന്നാണ് പ്രാഥമിക അന്വേഷണത്തിൽ നിന്ന് വ്യക്തമായത്. ഒരു ടെമ്പോയിൽ വീട്ടുപകരണങ്ങൾ കയറ്റുന്നതിനിടെ, മുൻ സീറ്റിൽ ഇരിക്കുന്നതിനെച്ചൊല്ലി അച്ഛനും മകനും തമ്മിൽ രൂക്ഷമായ തർക്കമുണ്ടായി. പിൻ സീറ്റിലെ ഇടുങ്ങിയ സ്ഥലമായതിനാൽ സുരേന്ദ്ര സീറ്റിൽ ഇരിക്കാൻ നിർബന്ധിച്ചതായും ഇത് ദീപക്കിനെ പ്രകോപിപ്പിച്ചതായും പൊലിസ് പറയുന്നു. കോപാകുലനായി ദീപക് തന്റെ പിതാവിന്റെ തോക്ക് എടുത്ത് വളരെ അടുത്ത് നിന്ന് വെടിവച്ചുവെന്നാണ് റിപ്പോർട്ട്.

പ്രതിയായ ദീപക്കിനെ സംഭവസ്ഥലത്തുവെച്ചുതന്നെ അറസ്റ്റ് ചെയ്തു. കുറ്റകൃത്യത്തിന് ഉപയോഗിച്ച ആയുധത്തിൽ നിന്ന് ഇരയുടേതായ ലൈസൻസുള്ള തോക്കും 11 ലൈവ് കാട്രിഡ്ജുകളും പൊലിസ് കണ്ടെടുത്തു. സംഭവത്തിൽ കൊലപാതക കേസ് രജിസ്റ്റർ ചെയ്ത് അന്വേഷണം തുടരുകയാണ്.