മസ്‌കത്ത്: കാറിൽ നിയമവിരുദ്ധമായി മദ്യം കടത്തുന്നതിനിടെ ഇന്ത്യൻ പ്രവാസി ഒമാനിൽ അറസ്റ്റിൽ. ഒമാൻ റോയൽ പോലിസ് ആണ് ഇക്കാര്യം അറിയിച്ചത്. ഇബ്രിയിലെ ഫഹൂദ് പ്രദേശത്ത് വൻതോതിൽ ലഹരിപാനീയങ്ങൾ കൈവശം വച്ചതിന് ഇന്ത്യൻ പ്രവാസിയെ അറസ്റ്റ് ചെയ്തതായി ഓയിൽ ആൻഡ് ഗ്യാസ് ഫെസിലിറ്റീസ് സെക്യൂരിറ്റി പോലീസ് കമാൻഡ് അറിയിച്ചു. 

മദ്യം ഉൾപ്പെടെയുള്ള ലഹരി വസ്തുക്കൾക്ക് നിരോധനം നിലവിലുള്ള ഒമാനിൽ ഇവ വിൽപ്പന നടത്തുക എന്ന ഉദ്ദേശ്യത്തോടെ സ്വകാര്യ വാഹനത്തിൽ കടത്തുന്നതിനിടെയാണ് ഇയാൾ പിടിയിലായത്. നിയമ നടപടികൾ പൂർത്തിയായി വരികയാണ്. അറസ്റ്റിലായ വ്യക്തിയുടെ വ്യക്തിഗത വിവരങ്ങൾ പുറത്തുവിട്ടിട്ടില്ല. കുറ്റക്കാരാനെന്നു കണ്ടെത്തിയാൽ ശിക്ഷ നടപടികൾക്ക് ശേഷം നാടുകടത്തൽ അടക്കമുള്ള നടപടികളിലേക്ക് നീങ്ങും.

കഴിഞ്ഞമാസം ഒമാനിൽ വ്യാജ കറൻസിയുമായി ഇന്ത്യക്കാരൻ പിടിയിലായിരുന്നു. തെക്കൻ ശർഖിയ ​ഗവർണറേറ്റിൽ നിന്ന് വ്യാജ കറൻസി മാറ്റാൻ ശ്രമിക്കുന്നതിനിടെ ആണ് ഇയാളെ പിടികൂടിയത്. തെക്കൻ ശർഖിയ ​ഗവർണറേറ്റ് പോലീസാണ് പ്രവാസിയെ പിടികൂടിയതെന്ന് റോയൽ ഒമാൻ പോലീസ് അറിയിച്ചു. പ്രതി ഇന്ത്യയിൽ ഏത് സംസ്ഥാനത്ത് നിന്നുള്ളയാളാണെന്ന വിവരം പുറത്തുവിട്ടിട്ടില്ല. 

Indian expat caught in Oman with illegal alcohol stockpile in private car