പറമ്പിക്കുളം: കാണാതായ ആദിവാസിയുടെ മൃതദേഹം തൂക്കക്കാവ് ഡാമില്‍നിന്നും കണ്ടെത്തി. പറമ്പിക്കുളം തൂണക്കടവ് ഡാമില്‍ മീന്‍പിടിക്കാന്‍ പോയി കാണാതായ സുങ്കം കോളനിയിലെ മുരുക (57)ന്റെ മൃതദേഹമാണ് ഇന്നലെ രാവിലെ കണ്ടെത്തിയത്. ബുധനാഴ്ചയാണ് മുരുകന്‍ തൂണക്കടവ് ഡാമില്‍ മീന്‍പിടിക്കാന്‍ പോയത്. രാത്രിയായിട്ടും തിരിച്ചെത്താത്തതിനെ തുടര്‍ന്ന് ബന്ധുക്കള്‍ പൊലിസില്‍ പരാതി നല്‍കിയിരുന്നു. മത്സ്യ ബന്ധനത്തിന് മുരുകന്‍ കൊണ്ടുപോയ പോണ്ടി ഡാമില്‍ ഒഴുകി നടക്കുന്നതിനെ ശ്രദ്ധയില്‍പ്പെട്ടതിനെത്തുടര്‍ന്ന് പൊലിസും നാട്ടുകാരും തെരച്ചില്‍ നടത്തിയെങ്കിലും ഫലമുണ്ടായില്ല. ചിറ്റൂര്‍ ഫയര്‍ഫോഴ്‌സ് സംഘം വ്യാഴാഴ്ചയും വെള്ളിയാഴ്ച്ചയും തുണക്കടവ് ഡാമില്‍ നടത്തിയ തെരച്ചിലിനൊടുവിലാണ് മൃതദേഹം കണ്ടെത്തുന്നത്. പൊലിസ് ഇന്‍ക്വസ്റ്റിന് ശേഷം മൃതദേഹം ജില്ലാ ആശുപത്രിയില്‍ പോസ്റ്റ്‌മോര്‍ട്ടം നടത്തി ബന്ധുക്കള്‍ക്ക് വീട്ടു കൊടുത്തു.