കായംകുളം: നിയന്ത്രണം വിട്ട കാറിടിച്ചു നാലു വിദ്യാര്‍ഥിനികള്‍ക്കു പരുക്കേറ്റു. ആലപ്പുഴ മുഹമ്മ മറ്റത്ത് വീട്ടില്‍ ജെബി (25), ചുനക്കര ശ്രീനിലയത്തില്‍ ശില്‍പ (22), മാന്നാര്‍ കവറാട്ട് ഗായത്രി (25), ആറന്മുള വെലുവക്കാട്ട് സനിത (25) എന്നിവര്‍ക്കാണു പരുക്കേറ്റത്.
ഇവര്‍ താലൂക്കാശുപത്രിയില്‍ ചികിത്സ തേടി. ഇന്നലെ വൈകിട്ട് നാലോടെ ദേശീയപാതയില്‍ കെ.എസ്.ആര്‍.ടി.സി ബസ് സ്റ്റാന്‍ഡിനു സമീപമായിരുന്നു അപകടം. ബാങ്ക് കോച്ചിങ് സ്ഥാപനത്തിലെ ക്ലാസ് കഴിഞ്ഞു സ്റ്റാന്‍ഡിലേക്കു നടന്നുവരികയായിരുന്ന ഇവരെ ഹരിപ്പാട് ഭാഗത്തുനിന്നും വന്ന കാര്‍ നിയന്ത്രണം വിട്ട് ഇടിച്ച് തെറുപ്പിക്കുകയായിരുന്നു.
ഇടിയുടെ ആഘാതത്തില്‍ രണ്ടുപേര്‍ ദേശീയപാതയില്‍ നിന്ന് താഴ്ചയിലേക്ക് തെറിച്ചുവീണു. മറ്റ് രണ്ടുപേരുടെ കാലിലൂടെ വാഹനത്തിന്റെ മുന്‍ ചക്രം കയറിയിറങ്ങി.
അപകടം കണ്ട് ഓടിക്കൂടിയ നാട്ടുകാരാണ് പരുക്കേറ്റവരെ ആശുപത്രിയില്‍ എത്തിച്ചത്. പിന്നീട് പൊലിസ് എത്തി കാര്‍ കസ്റ്റഡിയിലെടുത്തു