ആറ്റിങ്ങല്‍: വറ്റി വരണ്ട വാമനപുരം നദിയില്‍ നിന്ന് തോക്ക് കണ്ടെടുത്തു. ചൊവ്വാഴ്ച ഉച്ചയ്ക്ക് 12.30 മണിയോടെ പൂവന്‍പാറ പാലത്തിനു സമീപം ചെറിയ കയങ്ങളില്‍ കെട്ടിക്കിടക്കുന്ന വെള്ളത്തില്‍ വലയിട്ട് മീന്‍ പിടിക്കാന്‍ എത്തിയ യുവാക്കളാണ് വെള്ളം പിന്‍വലിഞ്ഞ നദിയിലെ ചെളിയില്‍ പുതഞ്ഞ നിലയില്‍ തോക്ക് കണ്ടത്. അവര്‍ ഉടന്‍തന്നെ പൊലിസില്‍ വിവരം അറിയിക്കുകയായിരുന്നു. സി.ഐ ജി. സുനില്‍കുമാറും സംഘവും എത്തി തോക്ക് കസ്റ്റഡിയിലെടുത്തു സ്റ്റേഷനിലേയ്ക്ക് കൊണ്ടുവന്ന് പരിശോധിച്ചു. ഏകദേശം രണ്ടു വര്‍ഷത്തോളം തോക്ക് നദിയില്‍ കിടക്കുകയായിരുന്നു എന്നാണ് പ്രാഥമിക നിഗമനം. തുരുമ്പു പിടിച്ച തോക്കിനുള്ളില്‍ ഒരു തിരയും ഉണ്ട്. വിശദമായ പരിശോധനയ്ക്കായി ഫോറന്‍സിക്ക് ഉദ്യോഗസ്ഥര്‍ക്ക് കൈമാറി. പൂവന്‍പാറ പാലത്തില്‍ നിന്ന് വലിച്ചെറിഞ്ഞതാവാമെന്ന് സംശയിക്കുന്നു. പരിശോധനാ ഫലം വന്നശേഷമേ മറ്റു കാര്യങ്ങള്‍ പറയാനാവൂ എന്ന് സി.ഐ പറഞ്ഞു.