തൊടുപുഴ: മ്ലാവിന്റെ ഇറച്ചി പങ്കിടുന്നതിനിടെ രണ്ടുപേരെ വനപാലകര്‍ പിടികൂടി. വനപാലകരെ കണ്ട് ഓടിരക്ഷപ്പെടാന്‍ ശ്രമിക്കുന്നതിനിടെ പാറക്കെട്ടില്‍ വീണ് ഒരാള്‍ക്ക് സാരമായി പരുക്കേറ്റു. പതിനാലാംമൈല്‍ വെള്ളാംതടത്തില്‍ അര്‍ജുന(50)നാണ് പരുക്കേറ്റത്.
ഇയാളെ വനപാലകരുടെ കസ്റ്റഡിയില്‍ കോട്ടയം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ഇയാളുടെ ബന്ധു സോമന്‍(46)നെ പിടികൂടി. സംഘത്തിലുണ്ടായിരുന്ന കപ്പിലാംതടത്തില്‍ സാബു, ജയ്‌സണ്‍ എന്നിവര്‍ക്കായി തെരച്ചില്‍ ഊര്‍ജിതമാക്കി.
വേട്ടയാടി പിടിച്ച മ്ലാവിനെ കൊന്ന് ഇറച്ചി പങ്കിടുന്നതിനിടെ രഹസ്യ വിവരം ലഭിച്ച വനപാലകര്‍ ഇവരെ പിടികൂടുകയായിരുന്നു. 80 കിലോയിലേറെ തൂക്കമുള്ള മ്ലാവിനെയാണ് വേട്ടയാടിയത്. ഇതുസംബന്ധിച്ച് കൂടുതല്‍ അന്വേഷണം നടത്തുമെന്ന് അടിമാലി റേഞ്ച് ഓഫിസര്‍ അറിയിച്ചു.