മങ്കട: മണ്ഡലത്തിലെ ഏഴ് സ്‌കൂളുകള്‍ക്ക് അടിസ്ഥാന സൗകര്യ വികസനത്തിന് 13 കോടി രൂപ അനുവദിച്ചതായി ടി.എ അഹമ്മദ് കബീര്‍ എം.എല്‍.എ അറിയിച്ചു. 2018-19 സാമ്പത്തിക വര്‍ഷത്തെ ബജറ്റ് ഫണ്ടില്‍ നല്‍കിയ നിര്‍ദേശങ്ങള്‍ക്കാണ് സര്‍ക്കാര്‍ അംഗീകാരം ലഭിച്ചത്.
ജി.എച്ച്.എസ്.എസ് മങ്കട, ജി.എച്ച്.എസ്.എസ് മങ്കട പള്ളിപ്പുറം, ജി.എച്ച്.എസ്.എസ് പാങ്ങ് എന്നിവക്ക് മൂന്ന് കോടി രൂപ വീതവും, ജി.എച്ച്.എസ് ചേരിയം, ജി.യു.പി.എസ് പാങ്ങ്, ജി.യു.പി.എസ് കൂട്ടിലങ്ങാടി, ജി.യു.പി.എസ് മങ്കട പള്ളിപ്പുറം എന്നിവക്ക് ഓരോ കോടി വീതം നാല് കോടിയടക്കം ആകെ പതിമൂന്ന് കോടി രൂപയുടെ പ്രവൃത്തികള്‍ക്കാണ് മണ്ഡലത്തിലെ വിവിധ സ്‌കൂളുകള്‍ക്ക് ഭരണാനുമതി ലഭിച്ചത്. പദ്ധതിയില്‍ ഉള്‍പ്പെട്ട സ്‌കൂളുകളുടെ ശാസ്ത്രീയമായ മാസ്റ്റര്‍പ്ലാനും വിശദമായ പ്രോജക്റ്റ് റിപ്പോര്‍ട്ടും തയാറാക്കുന്നതിന് സര്‍ക്കാര്‍ അംഗീകൃത ഏജന്‍സിയായ കിറ്റ്‌കോയെ ചുമതലപ്പെടുത്തിയിട്ടുണ്ട്.  ഇത്തവണ മണ്ഡലത്തിലെ 24 സ്‌കൂളുകള്‍ ഹൈടെക്ക് സൗകര്യമൊരുക്കുന്നതിന് നടപടി സ്വീകരിച്ചിട്ടുണ്ട്. ചേരിയം ജി.എച്ച്.എസില്‍ ആസ്തി ഫണ്ടില്‍നിന്നും 50 ലക്ഷമടക്കം ഒന്നരക്കോടിയും കടുങ്ങപുരം ഗവ. ഹയര്‍സെക്കന്‍ഡറിയില്‍ ആസ്തി ഫണ്ടില്‍ നിന്നും ഒരു കോടിയടക്കം 4.46 കോടിയും, പാങ്ങ് ഗവ. ഹയര്‍സെക്കന്‍ഡറിയില്‍ ആസ്തി ഫണ്ടില്‍ നിന്നും ഒരു കോടിയടക്കം നാല് കോടിയും മങ്കട പള്ളിപ്പുറം ഹയര്‍സെക്കന്‍ഡറിയില്‍ ആസ്തി ഫണ്ടില്‍ നിന്നും ഒരു കോടിയടക്കം വിവിധ കെട്ടിടങ്ങള്‍ക്ക് എട്ടു കോടിയും മങ്കട ജി.എച്ച്.എസ്.എസില്‍ ആസ്തി ഫണ്ടില്‍ നിന്നും ഒരു കോടിയടക്കം അഞ്ചു കോടിയും മങ്കട പള്ളിപ്പുറം ഗവ. യു.പി സ്‌കൂളില്‍ ആസ്തി ഫണ്ടില്‍ നിന്നും കെട്ടിടത്തിന് 65 ലക്ഷമടക്കം 1.65 കോടിയും, പാങ്ങ് ജി.യു.പിയില്‍ മാതൃകാ സ്‌കൂള്‍ പദ്ധതിക്ക് 35 ലക്ഷമടക്കം 2.35 കോടിയുടെ പ്രവൃത്തികളാണ് നടക്കുക.
എം.എല്‍.എയുടെ ആസ്തി വികസന ഫണ്ടില്‍ നിന്നും കഴിഞ്ഞ മൂന്നുവര്‍ഷം വിവിധ സ്‌കൂളുകള്‍ക്ക് 4.4 കോടി രൂപയും മറ്റു പദ്ധതികളുമായി 26.5 കോടി രൂപയും അനുവദിക്കാനായത് വലിയ നേട്ടമാണെന്നും ഇത് പ്രാവര്‍ത്തികമാകുന്നതോടെ മങ്കട മണ്ഡലം വിദ്യാഭ്യാസ രംഗത്ത് ഭൗതിക സൗകര്യങ്ങളുടെ കാര്യത്തില്‍ സമ്പൂര്‍ണമായ മാറ്റമുണ്ടാക്കുമെന്നും ഇത്തവണ പുത്തനങ്ങാടി ജി.എല്‍.പി.എസ്, പലകപ്പറമ്പ് ജി.എല്‍.പിഎസ്, പൂഴിക്കുന്ന് ജി.എല്‍പി എസ്, കര്‍ക്കിടകം ജി.എല്‍പി.എസ് എന്നിവക്ക് പുതിയ കെട്ടിടങ്ങള്‍ നിര്‍മിക്കുമെന്നും എം.എല്‍.എ പറഞ്ഞു.